नांदेड : मराठवाड्यातील संकल्पित नगर - बीड - परळी रेल्वे मार्ग व वर्धा - यवतमाळ - नांदेड या मार्गांसाठी यंदाच्या अर्थसंकल्पात आशादायक तरतूद करण्यात आली आहे. तरीही मराठवाड्यातील अनेक रेंगाळलेले प्रकल्प कालबद्ध पद्धतीने पूर्ण करण्याबद्दल दिलासा अर्थसंकल्पातून मिळालेला नाही.

नांदेड - बिदर रेल्वेमार्गाला मंजुरीचे गाजर दाखविले खरे परंतु कोणतीच समाधानकारक तरतूद नाही. त्यामुळे मराठवाड्यातील रेल्वे प्रकल्प पूर्ण करावेत, अशी मागणी मराठवाडा जनता विकास परिषदेचे अध्यक्ष, माजी खासदार डॉ. व्यंकटेश काब्दे व पदाधिकाऱ्यांनी केली आहे. जनता विकास परिषदेची येथे बैठक झाली. प्रा. के. के. पाटील, प्रा. जीवन देसाई, द. मा. रेडडी, प्रा. डॉ. अशोक सिद्धेवाड, प्रा. दामोधर थोरात, डॉ. मोहन फुले व रेल्वे संघर्ष समितीचे सचिव शंतनू डोईफोडे, ओमप्रकाश वर्मा आदी उपस्थित होते. मराठवाड्याचे भूमिपुत्र डॉ. भागवत कराड व रावसाहेब दानवे हे केंद्रीय मंत्रिमंडळात आहेत. मराठवाड्याच्या रेल्वे व इतर विकास प्रश्नांवर त्यांनी विशेष लक्ष देण्याची अपेक्षा असल्याचा सूर जनता विकास परिषदेने व्यक्त केला.

मंजुरी पण ठोस तरतूद नाही

अर्थसंकल्पात अपुरी तरतूद झाल्यामुळे नगर - परळी व वर्धा - नांदेड हे प्रकल्प वर्षानुवर्षे रेंगाळत आहेत. नांदेड - बिदर या प्रकल्पाला मंजुरी मिळूनही कोणतीच ठोस तरतूद केली नाही. त्यामुळे नांदेड - बिदर, नांदेड - लातूर रोड, सोलापूर - उस्मानाबाद हे रखडलेले प्रकल्प कालबद्धरितीने पूर्ण करावेत, अशी अपेक्षा व्यक्त करण्यात आली आहे. नोकर भरती करून लातूर येथील रेल्वे कोच फॅक्टरीचे काम कधी सुरु होणार, याकडे सर्वांचे लक्ष असल्याचे परिषदेने म्हटले आहे.