नांदेड : नांदेड ग्रामीण पोलिस ठाण्याच्या हद्दीतून चोरीला गेलेल्या पाच दुचाकी आणि नायगाव येथून चोरीला गेलेली एक अशा सहा गाड्या स्थानिक गुन्हे शाखेने रविवारी (ता.१२) जप्त केल्या आहेत. एक चोरटा नांदेड ग्रामीण आणि एक विधी संघर्षग्रस्त बालक नायगाव पोलिसांकडे दुचाकींसह स्वाधीन करण्यात आले आहेत.

मागील काही महिन्यात दुचाकी चोरट्यांची टोळी सक्रिय झाली आहे. दररोज शहरासह ग्रामीण भागातून अनेक दुचाकी चोरीस जात आहेत. यामुळे नागरिक हैराण झालेत. स्थानिक गुन्हे शाखेचे पोलिस निरीक्षक द्वारकादास चिखलीकर यांना मिळालेल्या माहितीनुसार त्यांनी आपल्या विभागातील पोलिस उपनिरीक्षक दत्तात्रय काळे, पोलिस अंमलदार संजय केंद्रे, संग्राम केंद्रे, पद्मसिंह कांबळे, रुपेश दासरवार, हेमवती भोयर, बालाजी यादगिरवाड, गणेश धुमाळ आणि चालक हेमंत बिचकेवार यांना पंचशीलनगर एमआयडीसी सिडको येथे पाठवले.

या पथकाने तेथे रोहित प्रल्हाद कांबळे (वय २४) याच्यासह एका विधी संघर्षग्रस्त बालकालाही ताब्यात घेतले. रोहित कांबळे याने नांदेड ग्रामीण ठाण्याच्या हद्दीत पाच तर विधीसंघर्षग्रस्त आरोपीने नायगाव येथून एक दुचाकी चोरल्याचे सांगितले. त्यानुसार रोहितला पाच दुचाकींसह नांदेड ग्रामीणच्या स्वाधीन केले तर विधी संघर्षग्रस्त बालकाला एका दुचाकीसह नायगाव पोलिसांच्या स्वाधीन केले आहे. या सर्व दुचाकींची किंमत एक लाख ९० हजार रुपये इतकी असल्याचे पोलिसांनी सांगितले.