देगलूर (जि.नांदेड) : देगलूर-बिलोली विधानसभा पोटनिवडणूकीसाठी (Deglur Bypoll) शनिवार (ता.30) सकाळी 7 पासून शांततेत व उत्साहात मतदानाला सुरुवात झाली असून दुपारी बारा वाजेपर्यंत 22 टक्के मतदान झाले आहे. या निवडणुकीतील काँग्रेसचे उमेदवार जितेश रावसाहेब अंतापूरकर (Jitesh Antapurkar ) यांनी आपल्या आई शितलताई रावसाहेब अंतापूरकर यांच्यासह अंतापूर येथे मतदान केले. भाजपाचे उमेदवार माजी आमदार सुभाष पिराजीराव साबणे (Subhash Sabane) यांनी देगलूर येथे सपत्नीक गंगुताई सुभाषराव साबने यांच्यासह मतदान केले तर वंचित आघाडीचे उमेदवार डॉक्टर उत्तमराव इंगोले यांनीही देगलूर येथे सपत्नीक मतदान केले.

शहरासह ग्रामीण भागातही मतदारांनी उत्साहात मतदानात सहभाग घेतला असून काही ठिकाणी मतदारांनी मी रांगा लावून मतदानात सहभाग घेतला आहे. दुपारपर्यंत शहर व परिसरात कोणताही अनुचित प्रकार घडला नसून मतदान अगदी शांततेत सुरू असल्याचे निवडणूक निर्णय अधिकारी सचिन गिरी यांनी सांगितले