नांदेड : आरटीपीसीआर तपासणी दरम्यान शासनाने ठरवुन दिलेल्या तपासणी दरापेक्षा अतिरिक्त रक्कम वसुल करणाऱ्या एका रुग्णालयाच्या जिल्हाधिकारी यांनी मुसक्या आवळल्या. डाॅक्टरलेन परिसरात असलेल्या एका लॅबवर हा गुन्हा दाखल होताच रुग्णांकडून कोरोनाच्या नावाखाली अतिरिक्त तपासणी दर वसुल करणाऱ्या रुग्णालयांचे धाबे दणाणले आहे. वजिराबाद पोलिस या प्रकरणाची अधिक तपासणी करत आहेत. 

येथील एका खासगी रुग्णालयात (लॅब) शासनाने नेमून दिलेल्या तपासणी दरापेक्षा अतिरिक्त दर वसूल करणाऱ्या एका रुग्णालयावर जिल्हाधिकारी डॉ. विपिन यांच्या आदेशावरुन गुन्हा दाखल करण्यात आला आहे. जिल्हाधिकारी डॉ. विपीन इटणकर, महापालिकेचे वैद्यकिय अधिकारी डाॅ. सुरेश सिंह बिसेन आणि त्यांचे सहकारी यांचे एक पथक डॉक्टर लेन येथे पोहोचले.

हेही वाचा - जिल्हा बॅंक निवडणुक : हेलिकाॅप्टर व रोड रोलरचे भवितव्य मतपेटीत बंद; 97.98 टक्के मतदान -

रुग्ण तपासणीदरम्यान समोर आलेल्या अभिलेखानुसार सरकारने आटीपीसीआर तपासणी दर सहाशे रुपये निश्चित केला असताना रुग्णांकडून दोन हजार रुपये घेत होते. याबाबत डॉ. सुरेशसिंह बिसेन यांनी वजिराबाद पोलिस ठाण्यात दिलेल्या तक्रारीनुसार रुग्णांकडून एकूण सोळा हजार रुपये आरटीपीसीआर तपासणी करण्यासाठी घेतलेले आहेत. सरकारने निश्चित केलेल्या तपासणी दरापेक्षा अकरा हजार दोनशे रुपये जास्त घेतले आहेत हे सिध्द झाले. वजिराबाद पोलिसांनी याबाबत भारतीय दंड संहितेच्या कलम 188, आपत्ती व्यवस्थापन कायदा कलम 51 (ब) आणि साथ रोग प्रतिबंधक कायदा 1897 च्या कलम 3 नुसार गुन्हा दाखल केला आहे. हा गुन्हा तीन मार्चच्या पहाटे एकच्या सुमारास दाखल करण्यात आला आहे. शशिकांत चंद्रकांत शेळके आणि आनंद राजाभाऊ बोकन अशी गुन्हा दाखल झालेल्या रुग्णालयातील कर्मचाऱ्यांची नावे आहेत. या प्रकरणाचा तपास पोलिस निरीक्षक जगदीश भंडरवार यांच्या मार्गदर्शनाखाली फौजदार श्री. पन्हाळकर करत आहेत.