नांदेड :  संबंध जगाला आपल्या कवेत घेणाऱ्या कोरोनाचा प्रादूर्भाव मागील एक महिण्यापासून जरा कमी झाला. कोरोना बाधित रुग्णांच्या संख्येत सध्या घट झाली असली तरी कोरोनाचा प्रादुर्भाव कमी झाला या भ्रमात नागरिकांनी राहू नये असा इशारा कै. डॉ. शंकरराव चव्हाण शासकीय वैद्यकीय महाविद्यालय व रुग्णालयाचे अधिष्ठाता डॉ. सुधीर देशमुख यांनी दिला आहे.

कोरोना प्रादुर्भाव वाढल्यामुळे माहे मार्चपासून लॅाकडाऊन घोषित करण्यात आला. त्यानंतर टप्प्याटप्प्याने बाजारपेठ उघडण्यास मुभा देण्यात आली. वाहतूक सेवाही सुरु झाली. प्रारंभी कोरोना बाधित रुग्णांच्या संख्येत मोठी वाढ झाली होती. तर मृत्यूची संख्या वाढली होती. सद्यस्थितीत कोरोना बाधित रुग्णांच्या संख्येत घट झाली असली तरी कोरोनाचा प्रादुर्भाव कमी झाला या भ्रमात नागरिकांनी राहू नये. 

हेही वाचा - गोंदियात नायब तहसीलदारांवर वाळूमाफियांचा हल्ला, शासकीय वाहनाच्या फोडल्या काचा 

युरोप सारख्या देशात कोरोनाच्या रुग्णांत वाढ झाली आहे. या देशात कोरोनाचा दुसरा टप्पा सुरु झाल्याची भीती निर्माण झाली असून भारतातही दिल्ली सारख्या शहरात कोरोनाचा उद्रेक सुरु झाला. त्याचा फटका इतर भारतातील राज्याला बसण्याची शक्यता नाकारता येत नाही. नांदेड जिल्ह्यात कोरोना बाधित रुग्णांच्या संख्येत घट झाली असली तरी उपाययोजना म्हणून डॉक्टर मंडळी उपचारासाठी सज्ज असल्याचे त्यांनी सांगितले.

मास्क बांधा, नियमित सॅनिटायझरचा वापर करा 

कोरोनाच्या संसर्गाचा अद्याप संपला नाही. त्यामुळे खबरदारीचा उपाय म्हणून नागरिकांनी गर्दी न करता तोंडाला मास्क बांधावा आणि सॅनिटायजरचा नियमित वापर करावा असे आवाहनही अधिष्ठाता डॉ. सुधीर देशमुख यांनी केले असून आपला व परिवाराचा बचाव करण्यासाठी काळजी घ्या असे आवाहन त्यांनी केले आहे.