नांदेड : खरिपात अतिवृष्टी तसेच परितीच्या पावसामुळे लाखो हेक्टरवरील पिकांचे नुकसान झालेल्या शेतकऱ्यांना सरसकट पिकविमा मिळाव्या या मागणीसाठी शेतकरी कष्टकरी संघर्ष समितीकडून सोमवारी (ता. १४) जिल्हा अधीक्षक कृषी अधिकारी कार्यालयासमोर धरणे आंदोलन करण्यात आले. यावेळी उपस्थित शेतकऱ्यांनी दावे दाखल केलेल्या शेतकऱ्याशिवाय इतर नुकसानग्रस्तांना पिकविमा देण्याची मागणी करत जिल्हा अधीक्षक कृषी अधीकारी रविशंकर चलवदे यांना हजारो अर्ज सादर केले. 

नवा मोंढा भागातील जिल्हा अधीक्षक कृषी अधिकारी कार्यालयासमोर शेतकऱ्यांनी धरणे आंदोलन केले. यावेळी शेतकरी कष्टकरी संघर्ष समितीचे निमंत्रक कैलास येसगे, माजी खासदार डॉ. व्यंकटेश काब्दे, प्रा. बालाजी कोंपलवार, राजन क्षीरसागर, शुभाशीष कामेवार, हनुमंत राजेगोरे, लक्ष्मण शिंदे, गंगाधर गायकवाड यासह उपस्थित काही शेतकऱ्यांनी आंदोलनाकर्त्यांना मार्गदर्शन केले. 

हेही वाचा - करार शेती पध्दतीने शेतकऱ्यांच्या जमिनीच्या मालकी हक्कावर कधीच गदा येणार नाही- पाशा पटेल

नांदेड जिल्ह्यात सप्टेंबरमध्ये अतिवृष्टी झाली. यानंतर ऑक्टोंबरमध्ये परतीच्या पावसाने झोडपून काढल्यामुळे जिल्ह्यातील साडेपाच लाख हेक्टरवरील खरिप पिकांचे नुकसान झाले. जिल्ह्यातील साडेनऊ लाख शेतकऱ्यांनी खरिपात पिकविमा भरला. परंतु नुकसानीबाबत विमा कंपनीने मात्र तुरळक शेतकऱ्यांना भरपाइ दिली. नुकसान सरसकट झाल्यामुळे सर्वच शेतकऱ्यांना भरपाइ मिळण अपेक्षीत असताना विमा कंपनीच्या चुकीच्या निकषामुळे लाखो शेतकरी विम्यापासून वंचित राहिले, असा सूर उपस्थितांनी आवळला. 

यामुळे जिल्ह्यातील सादर करण्यात येत असलेल्या अर्जाची सुनावणी घेवून सर्वच शेतकऱ्यांना विमा भरपाइ देण्याची मागणी जिल्हा अधीक्षक कृषी अधिकारी रविशंकर चलवदे यांच्याकडे करण्यात आली. आंदोलनकर्त्यांनी हजारो अर्जाचे गठ्ठे श्री चलवदे यांना सादर करुन नुकसानीचे प्रमाण अधीक असल्यामुळे पिककापणी प्रयोगाची वाट न पाहता शेतकऱ्यांना भरपाइ देण्याची मागणी केली.

हे देखील वाचाच - नांदेड : दिल्लीतील शेतकरी आंदोलनास गुरुद्वारा बोर्डाचा पाठिंबा ; लंगर सेवा सुरू

भरपाई मिळावी हीच आमची भूमिका आहे
पिकविमा मिळावा यासाठी शेतकऱ्यांनी दाखल केलेल्या अर्जाची माहिती पाठविली कृषी विभागाकडून कंपनीकडे कळविण्यात येइल. नुकसानग्रस्त शेतकऱ्यांना भरपाइ मिळावी, अशी आमची भुमीका आहे. 
- रविशंकर चलवदे, जिल्हा अधीक्षक कृषी अधिकारी, नांदेड.