नांदेड: मुलाला कॅनडामध्ये नोकरी लावतो, असे सांगून एका महिलेकडून ३० लाख ७५ हजार रुपये घेऊन फसवणूक केल्याची घटना शहरातील गुरुद्वारा लंगर साहिब येथे घडली. याप्रकरणी तीन संशयितांविरुद्ध वजिराबाद पोलिस ठाण्यात शुक्रवारी (ता. १३) गुन्हा दाखल झाला. त्यात दोन महिलांचा समावेश आहे.

शहरातील वजिराबाद भागात नगिना घाट परिसरातील गुरुद्वारा लंगर साहिब येथे जगदीपकौर हरपालसिंघ संधू (वय ४६, मूळ रा. भूमी गार्डन प्लॉट नं. सात, सेक्टर १७, कलंबोली रस्ता, पाली, नवी मुंबई) या सेवा करण्यासाठी राहतात. त्यानिमित्ताने ओळखीतून त्यांच्याकडे रणजितसिंघ, दिव्या शर्मा आणि कुलवंत कौर असे तिघेजण आले. तुमच्या मुलाला कॅनडात नोकरी लावून देतो, असे त्यांनी सांगितले. त्यानंतर त्यांनी खोटा व्हिसा तयार करून तो खरा असल्याचे भासवला. त्यांच्याकडून सहा ऑगस्ट २०१९ ते २० ऑगस्ट २०१९ दरम्यान टप्प्याटप्प्याने ३० लाख ७५ हजार रुपये घेतले. मात्र, मुलाला नोकरी मिळाली नाही.

फसवणूक झाल्यामुळे त्यांनी पैसे परत मागण्यासाठी तिघांशी मोबाइलवर संपर्क साधला. मात्र त्यांनी ठार मारण्याची धमकी दिली. या प्रकरणी तिघा संशयितांविरुद्ध वजिराबाद पोलिस ठाण्यात गुन्हा दाखल झाला. फौजदार जाधव तपास करीत आहेत.