वाई बाजार ( जिल्हा नांदेड) : कोरोना पॉझिटिव रुग्णाच्या संख्येत वाढ झाल्याने जिल्ह्यात संचारबंदी घोषित झाली. यात सर्वात मोठी वाताहात झाली ती मद्य शौकिनांची, बंद दुकानाच्या मागच्या दारातून दारु पुरवली जात आहे. परंतु त्याचे दर वाढल्याने ते न परवडणारे आहे. अशाच व्हाईट कॉलर मद्यपींसह मोलमजुरी करुन हौस भागविणारे मजूर व युवावर्ग 'श्रीमंतांना आवडते, गरिबांना परवडते' स्वस्त आणि मस्त हातभट्टी गावठी मोहाच्या दारुकडे वळले आहे. त्यामुळे खेड्यापाड्यात मोहाची दारु पाडली जात असल्याने पोलिसांनी आपला कटाक्ष या दारु विक्रेत्यांकडे करुन कारवाईला सुरुवात केल्याची परिस्थिती सध्या वाई बाजार परिसरात पाहायला मिळत आहे.

लॉकडाऊनमध्ये शिथिलता आणल्यानंतर नांदेड जिल्ह्यातील कोरोना रुग्ण संख्येचा अचानक उद्रेक झाल्याने जिल्हाधिकाऱ्यांनी त्यांना प्राप्त अधिकाराचा वापर करत जिल्ह्यात संचारबंदी घोषित केली. यात प्रामुख्याने दारू दुकाने, बियर बार, बिअर शॉपी आदी दारूविक्रीशी संबंधित आस्थापना बंद ठेवण्याचे आदेश दिले. परिणामी गावठी हातभट्टी मोहाची दारू पाळणाऱ्याचे सुगीचे दिवस आले. माहूर तालुक्यातील वाई बाजार परिसरातील लहान- मोठ्या नाल्याच्या काठेला तसेच पैनगंगा नदीच्या काठावर पूर्वी रॉकेलसाठी वापरत असलेल्या टाकीने मोहाची दारू पाडली जात आहे. मद्य शौकिनांना देखील संचार बंदी काळात माफक दरात गावठी दारू उपलब्ध होत असल्याने त्यांचे देखील संतुलन अबाधित आहे.

हेही वाचा - विभागीय आयुक्त सुनील केंद्रेकर यांनी घेतला नांदेडला कोरोना संसर्गाबाबत आढावा

खेड्यापाड्यात पाडली जाणारी गावठी दारूची विक्री करण्याचा नवीन उद्योग तरुण मंडळी देखील करताना पाहायला मिळत आहे. वाई बाजार सारख्या ठिकाणी गावठी दारू पाण्याच्या बाटलीमध्ये दोनशे रुपये प्रमाणे विक्री केली जात आहे. संचारबंदी काळातही गावठी दारूची बेसुमार विक्री केली जात असल्याची बातमी सर्वदूर पसरल्याने सिंदखेड पोलिसांनी जंग जंग पछाडने सुरू केले त्यात (ता. २९) रोजी सायंकाळच्या सुमारास हरडफ शिवारात प्रल्हाद चव्हाण यांच्या शेतात दोन प्लास्टिकच्या पाच लिटरच्या कॅनमध्ये दहा लिटर गावठी हातभट्टी मोहाची दारू अंदाजे पाचशे रुपये किमतीची विनापरवाना बेकायदेशीर रित्या चोरटी विक्री करण्याच्या उद्देशाने ताब्यात बाळगून मिळून आल्याने ती जप्त करून दारूची भट्टी व दारू पाडण्यासाठी तयार करण्यात आलेले द्रावण नष्ट करून आरोपीविरुद्ध पोलिस हकीम खान पठाण यांच्या फिर्यादीवरून गणेश पाटील राहणार हरडफ ता. माहूर वर गुन्हा दाखल करण्यात आले असून गुन्ह्याचा तपास श्री.  कुमरे करीत आहेत.

संपादन- प्रल्हाद कांबळे