मांडवी (जि. नांदेड) : मांडवी ते पाटोदा (बुद्रुक) रस्त्यावर दोन दुचाकींचा अपघात झाला. यात एक युवक ठार झाला तर तीन जण गंभीर जखमी झाले. दरम्यान, जखमींपैकी एकाचा मृत्यू झाला, अशी चुकीची माहिती मिळाल्याने त्याच्या आजीचा धक्क्यामुळे मृत्यू झाला.

शिवजयंतीचे सामान खरेदीसाठी विवेक गणपत सोनुले (वय २०), अनिकेत रवी रेणके (वय १९ रा. पाटोदा बु. ता. किनवट) हे पाटोद्यावरून मांडवीकडे दुचाकीवरून जात होते तर आशना कुंटलवार (वय ४६) आणि लक्ष्मण धर्मा कुमरे (वय ३९, रा. लिंगी, ता. किनवट) हे दुचाकीने (टीएस-०१, ईए-२०३६) मांडवीहून लिंगीकडे जात होते.

दोन्ही दुचाकींची समोरासमोर धडक झाली. त्यात चारही जण जखमी झाले. यात विवेक सोनुले व अनिकेत रेणके हे गंभीर असल्यामुळे ग्रामीण रुग्णालयाचे डॉ. विक्रम राठोड यांनी प्राथमिक उपचार करून आदिलाबाद येथे उपचारासाठी संदर्भित केले. सोनुलेला आदिलाबादवरून नागपूर येथे नेत असताना वाटेतच त्याचा मृत्यू झाला. दरम्यान, या घटनेतील गंभीर जखमी अनिकेत रेणके याच्या मृत्यूची अफवा गावात पसरताच त्याची आजी छबूबाई शंकर रेणके यांना मोठा मानसिक धक्का बसला. यातच त्यांचा मृत्यू झाला. साईनाथ गंगाधर सोनुले यांनी दिलेल्या तक्रारीवरून आशना कुंटलवार यांच्याविरुद्ध मांडवी पोलिसात गुन्हा नोंद करण्यात आला. तपास पोलिस उपनिरीक्षक पठाण करीत आहेत.