नांदेड ः कोरोनाचा संसर्ग मध्यंतरी काही प्रमाणात कमी झाल्यामुळे शाळा सुरू करण्यात आल्या होत्या. दरम्यान, स्कूल बसेस तसेच व्हॅन सुरू होण्याची शक्यता निर्माण झाली होती. मात्र आता कोरोना रुग्णांची संख्या पुन्हा वाढत असल्यामुळे शाळा बंद झाल्यात. त्यामुळे फायनान्सकडून घेतलेल्या कर्जाचे हप्ते कसे भरायचे, या चिंतेने चालक-मालक हैराण झालेले आहेत. 

काही दिवसात अधिकृतपणे स्कूलबस सुरू होण्याची शक्यता निर्माण झाली होती. मात्र पुन्हा कोरोना रुग्णांची संख्या वाढली आणि शाळा बंद करण्यात आल्या. पर्यायाने स्कूल बस सुरू होण्याची शक्यता पुन्हा मावळली आहे. स्कूल बसेस, व्हॅन बंद असल्याने चालक मालक आणि विद्यार्थ्यांची देखरेख करण्यासाठी नेमलेल्या सहायकांची परिस्थिती हलाखीची झाली आहे. अनेक जण भाजीपाल्यासह विविध व्यवसाय, धंदा करून कसाबसा आपला उदरनिर्वाह चालवित आहेत. शाळा बंद असल्याने राज्य शासनाने स्कुलबससाठी कर्जात सूट दिली होती ती मुदत आता संपली आहे. 

हेही वाचा - संचारबंदी काळात शासकीय, निमशासकीय कार्यालये, बँकचे कामकाज सुरु राहणार आहे

बँका आणि वित्त संस्थांचे हप्तेही सुरू आहेत. त्याचप्रमाणे विम्याबाबत कोणतीही सवलत मिळाली नाही. व्यवसाय बंद असल्याने स्कूल बस चालकांच्या डोक्यावर अप्रत्यक्ष कर्जाचा बोजा वाढत चालला आहे. आवक बंद असल्याने कर्ज फेड करायची कशी? असा प्रश्न त्यांच्या समोर आहे. शाळा, शिकवणी वर्ग, महाविद्यालये बंद असल्यामुळे गत १२ महिन्यांपासून स्कूलबस, व्हॅन, मॅजिक, अॅटो यांच्यावर उपासमारीची वेळ आली आहे. त्यांना कुठल्याही प्रकारचे पर्यायी उत्पन्न नाही. त्यामुळे बॅंक, फायनान्स कंपन्यांचे कर्जाचे हप्ते थकणे स्वाभाविकच आहेत. त्यामुळे शासनाने सकारात्मक भूमिका घेण्याची गरज निर्माण झाली आहे. 

हे देखील वाचाच - नांदेड : लाॅकडाऊनमुळे, किड्नी पेशन्टची हेळसांड; बस सेवा बंद केल्यामुळे, दुचाकीवरुन प्रवास

शासनाकडून जीवनावश्यक कीटही दिली नाही 
फायनान्स कंपन्यांचे एजंट गुंड लोकांना पाठवून धमक्या देत आहेत. त्यांना वेळीच पायबंद घालावा. अन्यथा स्कूलबस व्हॅनचे चालक मालकांना आत्महत्या करण्याशिवाय दुसरा कुठलाच पर्याय नाही. अद्यापपर्यंत स्कूलबस व्हॅनचे चालक मालक यांना शासनाने कुठलीही मदत केलेली नाही. जीवनावश्यक कीट देखील दिली नसल्याची खंत स्कूल व्हॅन, बस चालक मालकांनी ‘सकाळ’शी बोलताना व्यक्त केली. 

येथेही क्लिक कराच - नांदेड : भाव गडगडले आणि कोबी- टोमॅटोच्या शेतात सोडले गुरे; शेतकऱ्यांनी घेतला धक्कादायक निर्णय

हप्ते भरण्यास सवलत मिळावी
स्कूल व्हॅन चालकांना फायनान्स कंपनी कर्ज देते ते शाळेच्या करारनामा लेटर व स्कूलबस पाहूनच. त्यामुळे शाळा व्यवस्थित सुरु असेलतरच कर्जाची परतफेड करणे सोयीचे होते. अन्यथा इतर पर्यायी मार्ग उपलब्ध नसल्याने कर्जाची परतफेड करणे शक्य नाही. त्यामुळे शासनाने मदत द्यावी, किंवा हप्ते भरण्यासाठी सवलत द्यावी. 
- निखिल लातूरकर, संस्थापक अध्यक्ष, नांदेड जिल्हा स्कूल बस व्हॅन-मॅजिक-अॅटो संघटना