नांदेड : आगामी खरीप हंगामाकरिता लागणारे बियाणे, खते तसेच कीटकनाशकांची कमतरता भासणार नाही. याबाबत कृषी विभागाने सूक्ष्म नियोजन केले आहे. शेतकर्‍यांनी उपयुक्त पाऊस झाल्यावरच पेरणी करावी असे आवाहन जिल्हा अधीक्षक कृषी अधिकारी रविशंकर चलवदे यांनील केले आहे.

आगामी खरीप हंगाम २०२१- २२ साठी कृषी विभागाने शेतकर्‍यांना लागणार्‍या बियाणे, खते तसेच किटकशानाकाच्या उपलब्धते बाबत सूक्ष्म नियोजन केले आहे. खाजगी, सार्वजनिक क्षेत्राकडून बियाण्यांची मागणी करण्यात आली आहे. यामुळे सध्या तूर, मूग, उडीद, सोयाबीन, कापूस व ज्वारी या वाणाचे बियाणे मुबलक प्रमाणात आहे. तसेच शेतकर्‍यांना लागणारे रासायनिक खतेही मोठ्या प्रमाणात उपलब्ध असल्याची माहिती त्यांनी दिली.

हेही वाचा - तहसीलदार पांडुरंग माचेवाड यांनी पकडलेल्या वाळुच्या टिप्परवर कारवाई न करण्यासाठी तीन लाखाच्या लाचेची मागणी

जिल्ह्यात तीन लाख क्विेंटल सोयाबीन बियाणे आवश्यक आहे. यापेकी साठ ते सत्तर टक्के बियाणे शेतकर्‍यांकडे घरचे उपलब्ध आहे. तर बाजारा ६५ हजार क्विंटल बियाणे उपलब्ध आहे. आवश्यकतेनुसार ३० हजार क्विंटल बियाणे पुन्हा उपलब्ध होईल, असे ते म्हणाले. शेतकर्‍यांनी सोयाबीनची पेरणी ८० ते १०० मिलीमीटर पाऊस झाल्याशिवाय करु नये. घरच्या बियाणांची उगवण क्षमता तपासावी, असे आवाहन श्री चलवदे यांनी केले आहे.

जिल्ह्याला दोन लाख दोन हजार ४१० टन खताची आवश्यकता आहे. तर दोन लाख नऊ हजार चाळीस टन खत आवंटन मंजूर झाल्याचे श्री चलवदे यांनी सांगितले. आजपर्यंत एक लाख ४० हजार ५४८ टन उपलब्ध झाले आहे. तर ६५ हजार ३८४ टन खताची विक्री झाली. ७५ हाजर १६४ टन शिल्लक आहे. डीएपी खताचे रेक सध्या उपलब्ध होत असल्याचे सांगीतले.