नांदेड : गोड पदार्थांसह चहाची लज्जत वाढविण्यासाठी विलायचीचा वापर अनिवार्य ठरतो. पण आता या पदार्थांचा सुगंध आणि गोडवा कमी होण्याची चिन्हे आहेत. कारण गेल्या १५ दिवसांत मसाल्याची राणी असलेल्या विलायचीचे भाव कडाडले आहे. विलायचीच्या दरात प्रती किलो तीनशे रुपयांनी वाढ झाली आहे. यामुळे मसाल्यांसह विविध मिष्ठान्न पदार्थांची चव बदलण्याची शक्यता आहे.

भारतात सर्वाधिक मसाल्याच्या पदार्थांचे उत्पादन केरळमध्ये घेतले जाते. महाराष्ट्रात सर्वाधिक विलायचीची आवक ही केरळातूनच होते. मात्र, काही काळापासून विलायचीला बाहेर देशातून मागणी वाढली आहे.

त्यातच उत्पादन घटल्याने विलायचीचे भाव गेल्या १५ दिवसांत वाढले आहेत. यामुळे आता गोड पदार्थातून मसाल्याची राणी विलायची गायब होण्याच्या मार्गावर आहे. तर, सामान्यांच्या आहारालाही आता महागाईच्या झळा बसत आहेत. गेल्या पंधरा दिवसांपूर्वी विलायची प्रति किलो एक हजार दोनशे रुपये होती. ती आता दीड हजार रुपयांवर गेल्याचे ड्रायफ्रुट व्यापाऱ्यांनी सांगितले.

विलायचीचे आरोग्यासाठी फायदे

आरोग्याच्या दृष्टीने विलायचीचे विशेष महत्त्व आहे. अॅसिडिटी, तणाव, रक्तदाब, बद्धकोष्ठता, मुत्र संसर्ग, पचनाचा त्रास अशा विविध गोष्टींसाठी विलायची उपयुक्त आहे. पण मसाल्याच्या पदार्थातून विलायची बेपत्ता होण्याच्या मार्गावर असल्याने त्याचा धोका आरोग्यालाही निर्माण होऊ शकतो.

ओवा दिडशेनी महागला...

ओवा खाण्यामुळे पचनक्रिया सुधारत असल्याने स्वयंपाकात त्याचा नियमित वापर होतो. पावसाळ्यात भजी अथवा इतर तळलेल्या पदार्थाचा बेत नेहमीच केला जातो. अशावेळी ओव्याचा उपयोग केला जातो.

यामुळे पदार्थांचा खमंगपणा तर वाढतोच शिवाय पचनक्रियेलाही त्याचा फायदा होतो. पंधरा दिवसांपूर्वी दोनशे रुपये किलो असलेला ओवा आता ३४० -३५० रुपये प्रती किलोवर पोहचला आहे.

विलायचीच्या दरात सतत वाढ होत आहे. विदेशात मोठ्या प्रमाणात विलायचीची निर्यात वाढल्याने देशांतर्गत विलायचीच्या दरात वाढ झाली आहे. अजूनही भाव वाढण्याची शक्यता आहे.

- अर्जुन मणियार, ड्रायफ्रुट विक्रेते.