नांदेड : जिल्हा तसेच तालुकास्तरीय भरारी पथकाच्या तपासणीत खरिप हंगामादरम्यान बियाणे विक्री करताना अनियमितता आढळून आल्याने किनवट तालुक्यातील तीन तर देगलूर तालुक्यातील दोन अशा तीन कृषी सेवा केंद्राचे परवाने निलंबीत करण्यात आल्याची माहिती कृषी विभागाने दिली.

जिल्ह्यात खरिप हंगामादरम्यान बियाणे विक्री करताना कृषी निविष्ठा विक्री केंद्राकडून नियमांचे पालन होत नसल्याच्या तक्रारी आल्या होत्या. यासोबतच अनेक ठिकाणी सोयाबीन बियाणे अधीक दराने विक्री होत असल्याच्याही तक्रारी होत्या. बियाणे विक्रेत्यांनी बियाणे कायदा १९६६ चे उल्लंघन केल्यामुळे जिल्हा तसेच तालुकास्तरीय भरारी पथकाने पाच कृषी निविष्ठा विक्री केंद्राचे परवाने निलंबीत केले आहेत. यात किनवट तालुक्यातील सारखणी येथील निलेश कृषी सेवा केंद्र व श्रीरामजी कृषी सेवा केंद्र तर किनवट येथील सेवादास कृषी सेवा केंद्राचा समावेश आहे. दुसर्‍या कारवाईत देगलूर तालुक्यातील जिजाऊ कृषी सेवा केंद्र हाणेगाव व देगलूर येथील शिवकृपा कृषी सेवा केंद्राचा समावेश आहे.

हेही वाचा - कोरोना रुग्णांमध्ये आढळून आलेली ही पहिलीच घटना आहे.

या कृषी सेवा केंद्राचा बियाणे साठा नमुना जुळून आला नव्हता. विक्री केलेल्या बियाणांचे कागदपत्र सादर न केल्यामुळे बियाणे विक्री परवाना निलंबीत करण्यात आला आल्याची माहिती कृषी विभागाच्या सुत्राने दिली. जिल्हास्तरीय पथकात जिल्हा गुणवत्ता नियंत्रण निरिक्षक बी. बी. गिरी, मोहिम अधिकारी एन. जी. हुंडेकर यांचा समावेश होता. तर देगलूर तालुकास्तरीय पथकात तालुका कृषी अधिकारी शिवाजी शिंदे, पंचायत समितीचे कृषी अधिकारी सुनील विडोळे यांचा समावेश होता. किनवट तालुकास्तरीय पथकात तालुका कृषी अधिकारी बालाजी मुंडे यांचा समावेश होता.