नांदेड : जिल्ह्यात कोरोना संसर्ग टाळण्यासाठी ता. 25 मार्च पासून जिल्हाधिकारी डाॅ. विपीन यांनी लाॅकडाऊन लावला आहे. याचा फटका बसून लाल परीचे चाके थांबले आहेत. राज्य परिवहन महामंडळाच्या नांदेड आगारातून 485 बसची वाहतूक गेल्या आठ दिवसापासून बंद असल्यामुळे चार कोटींपेक्षा अधिक महामंडळाला फटका बसला आहे. 

मागील काही वर्षांपासून राज्य परिवहन महामंडळ या ना त्या कारणाने वाहतूक बंद करण्याची वेळ आली आहे. त्यामुळे गेले काही महिने राज्य परिवहन महामंडळाची बस प्रवासी वाहतूक पूर्णपणे बंद होती. त्या काळात देखील महामंडळाला कोट्यवधी रुपयांचा फटका बसला. कालांतराने 50 टक्के प्रवासी क्षमतेने बस वाहतूक सुरु करण्यात आली. नफा होण्याऐवजी महामंडळाला प्रवासी वाहतुकीमध्ये तोटा सहन करावा लागला. काही दिवसानंतर वाहतूक सुरळीत झाल्यामुळे महामंडळाला चांगले दिवस आले होते.

हेही वाचा - नांदेड : ग्रामीण भागात आजही विवाह सोहळ्यात घातले जाते बोहले; काय आहे महत्व ?

परंतु पुन्हा एकदा कोरोनाचा संसर्ग अतिशय वेगाने वाढत आहे. विविध उपाययोजना करुन रुग्णांची संख्या कमी करण्यासाठी शासन स्तरावरुन प्रयत्न होत असताना मात्र यश आलेले नाही. वाढती रुग्ण संख्या पाहता राज्य शासनाने यासंदर्भात जिल्हाधिकारी यांने निर्णय घेण्याचे आदेश दिले. नांदेड जिल्ह्यामध्ये गेल्या काही दिवसापासून कोरोना बाधितांची संख्या अधिक वाढत आहे. गुरुवारपर्यंत बाधितांची संख्या 44 हजार वीस वर पोहोचली आहे. तर आतापर्यंत रुग्णालयातून 32 हजार 653 रुग्णांना औषधोपचार यानंतर सुट्टी देण्यात आली आहे तर 820 रुग्णांचा मृत्यू झाला आहे जिल्ह्यामध्ये 10 हजार 300 19 रुग्ण सध्या उपचार घेत आहेत.

वाढत्या कोरोनाचा प्रादुर्भाव रोखण्यासाठी जिल्हाधिकारी विपीन इटनकर यांनी 25 मार्चपासून जिल्ह्यात लॉकडाऊन लावले आहे. आज मीतिला दोन एप्रिलॉपर्यंत गेल्या आठ दिवसांत एसटी महामंडळाची प्रवासी वाहतूक बंद असल्यामुळे दररोज सरासरी पन्नास ते साठ लाख रुपये प्रमाणे चार कोटी रुपयांच्यावर आर्थिक नुकसान झाल्याचे महामंडळाच्या विश्वसनीय सुत्रांनी सांगितले.