माहूर (जिल्हा नांदेड) - प्रेषित मोहमद् पैगंबर यांच्या जन्मदिनानिमित्त विविध कार्यक्रमांसोबतच माहूर येथे आज गुरुवार रोजी भव्य मिरवणूक काढण्यात आली. मिरवणुकीची सुरुवात गौसिया मशीदीपासून झाली. शहराच्या प्रमुख मार्गावरुन फिरुन मिरवणूक सोनापिर दर्ग्यावर पोहोचली.

मिरवणुकीमध्ये कुठलेही वाद्य वाजवण्यात आले नाही. अतिशय शांततेत उत्सव पार पडला. श्री गणेश विसर्जन मिरवणुकीच्या पार्श्वभूमीवर जशने मिलादून नबी मिरवणूक दिवसा काढून दुपारपर्यंत समारोप करण्यात आला.

नबी का दामन नही छोडेंगे, अशा घोषणा देण्यात आल्या, मिरवणुकीदरम्यान सरबत, व मिठाई वाटप करण्यात आली.

ईद-ए-मिलादुन्नबी निमित्त सजवलेल्या गाड्या, हिरव्या पताका, शुभेच्छा फलक घेऊन आबालवृद्धांसह मदरशांचे विद्यार्थी मिरवणुकीत सहभागी होते. डोक्यावर पगडी, सदरा अशा पारंपरिक वेशात सहभागी मुस्लिम बांधवांनी शिस्तबद्ध मिरवणूक काढली. यावेळी इस्लाम धर्माचे संस्थापक हजरत महंमद पैगंबर यांच्या स्मृतीप्रित्यर्थ काही वचने म्हणण्यात आली.

जुलूस-ए-मोहंमदी सकाळी ८.३० वाजता स्थनिक गौशिया मशीदीपासून झाली. तर समारोप दुपारी १२ वाजण्याच्या पूर्वीच सोनापिर दर्गाह येथे सलाम व दुवा चे पठन करून झाले. प्रेषित मोहंमद पैगंबर यांनी जगाला दिलेली शांती आणि मानवतेची शिकवण समाजातील प्रत्येक व्यक्तीपर्यंत पोहोचावी हा यामागील उद्देश असल्याचे या वेळी तकरीर मधून धर्म गुरूंनी सांगितले ईद-ए-मिलाद निमित्त आयोजित जुलुस अत्यंत उत्साहात व शांततेत पार पडला.

देशात शांतता, सद्भाव व परस्पर धर्मात आपसी भाईचारा वृध्दिंगत व्हावा. यासाठी सामुहिक दुवा झाली.या वेळी पोलिस प्रशासनाने अत्यंत चोख बंदोबस्त ठेवला होता. पोलिस आधिकार्यांनी या प्रसंगी समाज बांधवांशी संवाद साधला. माहूर चे प्रथम नागरिक नगर पंचायतचे नगराध्यक्ष फिरोज दोसानी यांनी प्रशासनाचे आभार मानत सत्कार केला. या वेळी बहुसंख्येने सर्व समाज बांधव उपस्थित होते. या वेळी ए. पी. जी अब्दुल कलाम चौकात फलकाला पुष्प अर्पण केले.