नांदेड : शासनाच्या निर्देशानुसार 45 वर्षांवरील सर्व नागरिकांना कोरोना प्रतिबंधक लस देण्यास सुरुवात केलेली आहे. त्यानुसार महावितरणच्या औरंगाबाद प्रादेशिक कार्यालयाच्या कार्यक्षेत्रातील 45 वर्षांवरील सर्व अधिकारी- कर्मचारी व त्यांच्या कुटुंबीयांनी कोरोना प्रतिबंधक लस घ्यावी, अशी विनंती सहव्यवस्थापकीय संचालक डॉ. नरेश गिते यांनी केली आहे.

महावितरणचे कर्मचारी ग्राहकांना सुरळीत वीजपुरवठा करण्यासाठी अखंडपणे राबत आहेत. त्यासाठी त्यांना सातत्याने घराबाहेर फिल्डवर कार्यरत रहावे लागते. यातून अनेकांना कोरोना संसर्ग होण्याचा धोका उद्भवतो. त्यामुळे त्यांनी कोरोना प्रतिबंधक लस घ्यावी, यासाठी महावितरण प्रशासन प्रयत्न करत आहे. औरंगाबाद प्रादेशिक कार्यालयाच्या कार्यक्षेत्रातील औरंगाबाद, जालना, बीड, उस्मानाबाद, लातूर, नांदेड, परभणी व हिंगोली या आठही जिल्ह्यांतील महावितरणच्या 45 वर्षांवरील सर्व अधिकारी- कर्मचारी व त्यांच्या कुटुंबीयांनी कोरोना प्रतिबंधक लसीकरण मोहिमेस प्रतिसाद द्यावा. 

हेही वाचा - वसमतमध्ये जमावबंदीच्या आदेशाला हरताळ

यासाठी सहव्यवस्थापकीय संचालक डॉ. नरेश गिते यांनी औरंगाबाद, लातूर व नांदेड परिमंडलाच्या मुख्य अभियंत्यांना उचित कार्यवाही करण्याचे सूचित केले आहे. याबाबत स्थानिक प्रशासन व आरोग्य विभागाशी समन्वय साधून 45 वर्षांवरील सर्व कर्मचाऱ्यांचे लसीकरण करुन घ्यावे तसेच या कर्मचाऱ्यांच्या दैनंदिन लसीकरणाचा अहवाल प्रादेशिक कार्यालयास सादर करण्यास सांगितले आहे.