बरबडा ( जिल्हा नांदेड) : शेतीच्या वादातून झालेल्या (Nanded farm dispute)हाणामारीतील एकाचा उपचारादरम्यान बुधवारी (ता. १९) दुपारी तीन वाजता मृत्यू झाला. ही घटना टेंभुर्णी (ता. नायगाव) येथे ता. १७ मे रोजी घडली होती. जखमीला नांदेडच्या विष्णुपूरी येथील शासकिय रुग्णालयात दाखल केले होते. या प्रकरणी नायगाव पोलिस ठाण्यात (Naigaon police station) भावकितील पाच जणांवर खूनाचा गुन्हा दाखल करण्यात आला आहे.

पोलिस सुत्रांनी दिलेल्या माहितीवरुन टेंभुर्णी (ता. नायगाव) येथील रामराव दिगंबर वडजे व त्याचा सख्खा भाऊ नागनाथ दिगंबर वडजे यांच्यात शेतीच्या मोजणी वरुन वाद होता. ता. १७ मे रोजी शेतात मोजणीसाठी दोघांचे कुटुंबीय गेले असता त्यांच्यात वाद झाला. व या वादाचे पर्यवसन हाणामारीत झाले. यावेळी काठी, दगडांनी नागनाथ दिगंबर वडजे (वय 34) याला मारहाण झाल्याने यात त्याला जबर दुखापत झाली. तसेच संदीप दिगंबर वडजे हाही जखमी झाला. संदीप वडजे यांच्या फिर्यादीवरुन नायगाव पोलिसात ता. 17 मे रोजी आरोपी माधव रामराव वडजे, बालाजी रामराव वडजे, प्रकाश रामराव वडजे,शिवाजी रामराव वडजे व रामराव दिगंबर वडजे यांच्याविरुद्ध गुन्हा दाखल करण्यात आला.

हेही वाचा - “गाळमुक्त तलाव व गाळयुक्त शिवार”साठी पुढे या- डॉ. विपीन इटनकर

मारहाणीत नागनाथ वडजे यास जबर मार असल्याने ग्रामीण रुग्णालय नायगाव येथे प्राथमिक उपचार करुन विष्णुपूरी येथील शासकिय रुग्णालयात हलवण्यात आले. गेल्या दोन दिवसांपासून उपचार चालू असताना बुधवारी (ता. १९) मेच्या दुपारी तीन वाजता त्याचा मृत्यू झाला. या दाखल गुन्ह्यात पुन्हा आता खूनाचा गुन्हा लावण्यात आला आहे. तपास पोलिस निरीक्षक आर. एस. पडवळ करत आहेत.

याच गावात मागील महिण्यात अशाच एका वादातून सख्या भावाने आपल्या भावाचा खून केला होता. ही घटना ताजी असतानाच पुन्हा दुसरा खून झाल्याने गावात भितीचे वातावरण पसरले आहे.

संपादन- प्रल्हाद कांबळे