नांदेड : कोरोनावर लाॅकडॉनमुळे विवाह सोहळा स्थगित झाले होते. पण आता अनलॉक प्रक्रिया सुरु झाली असून तुळशी विवाह संपताच लोक धुमधडाक्यात लग्न करायच्या तयारीत आहेत. परंतु कोरोनाची धास्ती अजूनही कायम असून प्रशासनानेही नियमावली लावून दिली आहे.

कोरोनामुळे मार्च महिन्यात लाॅकडाऊन झाल्याने हौसेने लग्नसोहळा करणाऱ्यांच्या उत्साहावर पाणी फेरले होते. मंगल कार्यालय, वाजंत्री, केटर्स, आचारी, बँडबाजे, इलेक्ट्रिक संबंधित सर्व लग्न निगडित असलेले कामे बंद पडली होती. परंतु आता आठ महिन्यानंतर झालेल्या पुन्हा कोरोना नियमांच्या अधीन राहून नियमांचे पालन करुन शासनाकडून परवानगी मिळाली. तुळशीचे विवाह सोहळे संपताच विवाह सोहळ्यासाठी मंडळी सज्ज झाली आहे. बँडबाजा, बरात आणि नाचगाणे वऱ्हाडी पुन्हा आनंदी झाल्याचे चित्र सध्या ग्रामीण भागामध्ये दिसून येत आहे.

हेही वाचा -  नांदेड : तीन दुचाकी चोरांना अटक, दागिणे व दुचाकीसह सात लाखाचा मुद्देमाल जप्त- शिवाजीनगर पोलिसांची कामगिरी -

गेल्यावर्षी लग्नसराईच्या धामधुमीत कोरोनाचे संकट असल्यामुळे लगीनघाई बंद पडल्याने अर्थव्यवस्था कोलमडून पडली होती. संचारबंदीमध्ये घरगुती पद्धतीने लग्न पुढे ढकलले. मात्र लग्नसमारंभांवर अवलंबुन असलेले रोजगार, व्यावसायी यांचे कंबरडे मोडले. लग्नानिमित्त निमंत्रण पत्रिका, कपडे, दागिने, किराणा, मंगल कार्यालय, वाहने या सर्व गोष्टींसाठी बराच खर्च होतो. या माध्यमातून हजारो लोकांना रोजगार, व्यवसाय उपलब्ध होतो. पण कोरोनाच्या लाटेमुळे त्यावर पाणी फेरले होते.

आता शासनाने लग्नसराईला परवानगी दिली. मात्र नियमावलीत शिस्तीत लोकांना लग्न सोहळे होण्याची आतुरता असून हे शहर व तालुक्याच्या ठिकाणी कार्यालयाची बुकिंग हाउसफुल होत आहे. विवाहसोहळ्यास पन्नास लोकांना परवानगी असली तरी पाचशेहून अधीक वऱ्हाडी मंडळी दिसून येत आहे. बँडबाजासह सर्व वऱ्हाडी निघत आहे. वाजत- गाजत तालावर नाचणारी वऱ्हाडी मंडळीमधअये मात्र शारिरीक अंतर व मास्क दिसून येत नसल्याने पुन्हा एकदा कोरोनाचे संकट ओढावते की काय असा प्रश्न उपस्थित होत आहे.