अर्धापूर : नांदेड कृषी उत्पन्न बाजार समितीवर गेल्या अनेक वर्षांपासून काँग्रेसची एकाधिकारशाही असून ती मोडीत काढून युतीच्या परिवर्तन पॅनलचे उमेदवार निवडून द्यावे, असे आवाहन खासदार प्रताप पाटील चिखलीकर यांनी मरळक (ता. नांदेड) येथील प्रचारसभेत सभेत रविवारी (ता. २३) केले. भारतीय जनता पक्ष - शिवसेना युतीच्या परिवर्तन पॅनलच्या प्रचाराचे नारळ प्रमुख नेत्यांच्या उपस्थितीत फुटले असून यंदा परिवर्तन होणार यावर ठाम विश्वास नेत्यांनी व्यक्त केला.

नांदेड बाजार समितीच्या निवडणुकीची प्रचाराची रणधुमाळी सुरू झाली असून मतदारांच्या प्रत्यक्ष भेटीवर भर देण्यात येत आहे. युतीच्या प्रचाराची पहिली सभा मरळक येथील महादेव मंदिर परिसरात घेण्यात आली.

या प्रचार सभेला खासदार चिखलीकर यांच्यासह खासदार हेमंत पाटील, आमदार बालाजी कल्याणकर, ज्येष्ठ नेते धर्मराज देशमुख आदी प्रमुख नेत्यांची उपस्थिती होती. या प्रचार सभेच्या अध्यक्षस्थानी संभाजीतात्या पावडे होते. पॅनलमधील सर्व उमेदवारांचा परिचय करून देण्यात आला.

यावेळी श्री. चिखलीकर म्हणाले की, केंद्र व राज्य शासनाच्या मदतीने नांदेड जिल्ह्यात अभुतपूर्व अशी विकासाची कामे सुरू आहेत. नांदेड जिल्ह्यातील रस्ते विकासासाठी सुमारे साडेसहा हजार कोटींचा निधी मंजूर झाला असून कामे सुरु आहेत. नांदेड बाजार समितीसह जिल्ह्यात अनेक वर्षांपासून एकाधिकारशाही सुरू आहे. सामान्य मतदारांनी गेल्या लोकसभा निवडणुकीत जसे परिवर्तन घडवून आणले त्याचप्रमाणे बाजार समितीत परिवर्तन करावे असे आवाहन श्री. चिखलीकर यांनी केले.

यावेळी खासदार हेमंत पाटील व आमदार कल्याणकर यांच्यासह इतरांनी मार्गदर्शन करुन परिवर्तन पॅनलच्या उमेदवारांना विजयी करावे, असे आवाहन केले. यावेळी शिवसेना जिल्हाप्रमुख संपर्कप्रमुख जाधव, महानगराध्यक्ष प्रवीण साले, आनंद पाटील बोंढारकर, चैतन्य देशमुख, अॅड. किशोर देशमुख, बंडू पावडे, मिलिंद देशमुख, उमेश मुंडे, शंकर मुतखलवार, व्यंकट मोकळे, डॉ. सचिन पाटील उमरेकर, बालाजी पाटील पुणेगावकर, दिलीप कंदकुर्ते, अनिल पाटील बोरगावकर, संतोष क्षीरसागर, बालाजी स्वामी, संजय अंभोरे, बाबुराव हेंद्रे, प्रल्हाद इंगोले आदी उपस्थित होते.