नांदेड : मागील अनेक दिवसांपासून जिल्ह्यातील कोरोनाबाधितांच्या (Corona) संख्येचे प्रमाण कमी-अधिक होत आहे. तर कधी शहरी भागात कोरोनाचा एकही रुग्ण आढळत नाही. शनिवारी (ता.१८) प्राप्त झालेल्या ७१४ अहवालापैकी ७१२ अहवाल निगेटिव्ह प्राप्त झाले यात एकही अहवाल कोरोना बाधित (Corona In Nanded) आढळला नाही. जिल्ह्यात आजवर एकूण बाधितांची संख्या ९० हजार ३०५ एवढी असून यातील ८७ हजार ६२४ रुग्णांना बरे झाल्याने रुग्णालयातून सुट्टी देण्यात आली आहे. आजच्या घडीला २९ रुग्ण उपचार घेत असून तीन बाधितांची प्रकृती अतिगंभीर आहे. जिल्ह्यातील कोरोनाचा प्रादुर्भाव कमी करण्यासाठी सेवाभावी संस्था, प्रतिनिधी आणि जागरुक नागरिकांनी आरोग्य जागराच्या चळवळीत जनतेने सहभाग घेवून मास्क, सॅनिटायझर, सुरक्षित अंतर आणि लसीकरण याबाबत व्यापक जनजागृती करुन अनावश्यक घराबाहेर पडणे टाळावे, असे आवाहन जिल्हाधिकारी डॉ. विपीन इटनकर यांनी केले आहे.

जिल्ह्यात आतापर्यंत बाधित मृत रुग्णांची संख्या दोन हजार ६५२ एवढी आहे. आज जिल्ह्यातील - तीन कोरोना बाधितांना औषधोपचारानंतर सुट्टी देण्यात आली आहे. यात मनपा अंतर्गत एन. आर. आय. भवन व गृह विलगीकरण- एक, खाजगी रुग्णालयातील- दोन असे एकुण तीन व्यक्तीला रुग्णालयातून सुट्टी देण्यात आली. शनिवारी २९ कोरोनाबाधित रुग्णांवर औषधोपचार सुरु आहेत. यात शासकीय वैद्यकीय महाविद्यालय विष्णुपुरी - सात, नांदेड मनपा अंतर्गत गृह विलगीकरण- १५, नांदेड जिल्ह्यातील तालुक्यांतर्गत गृह विलगीकरण- पाच, खासगी रुग्णालय - दोन

कोरोना मीटर
एकूण पॉझिटिव्ह - ९० हजार ३०५
एकूण कोरोनामुक्त - ८७ हजार ६२४
एकूण मृत्यू संख्या - दोन हजार ६५२
शनिवारी पॉझिटिव्ह - शुन्य
शनिवारी कोरोनामुक्त - तीन
शनिवारी मृत्यू - शुन्य
उपचार सुरु - २९
अतिगंभीर प्रकृती - तीन