नांदेड : दिवाळी हा आनंदाचा सण आहे. त्यामुळे दिवाळीमध्ये बहुतांश आपापल्या गावी जात असतात. हीच संधी साधून चोरट्यांनी आपला डाव साधून घरफोडी करून दिवाळी साजरी केली. जिल्ह्यात तीन ठिकाणी घरफोडी झाली असून, दोन लाख ४१ हजार ३४० रुपयांचा मुद्देमाल चोरट्यांनी चोरून नेला आहे.

विलास धोंडिबा महाजन (रा. तामसा रोड, नई आबादी हदगाव) हे दिवाळीनिमित्त कुटुंबियांसह सासरवाडी येथे गेले होते. चोरट्यांनी ही संधी साधून त्यांच्या घराचे कुलुप तोडून रोख रक्कम, सोन्या चांदीचे दागिने, होम थेटर, साखर, पंधरा किलो गोडतेल असा एकूण ३९ हजार ३४० रुपयांचा माल चोरून नेला आहे. विलास महाजन यांच्या फिर्यादीवरून हदगाव पोलिस ठाण्यात गुन्हा नोंद केला असून, सहायक पोलिस निरीक्षक श्री. पांढरे तपास करत आहेत.

तसेच वनिता रामराव राठोड (रा. चिखलवाडी भोकर) याही घराला कुलुप लावून बाहेरगावी गेल्या होत्या. त्यांच्याही घराचे कुलुप तोडून चोरट्यांनी रोख रकमेसह सोन्याचे दागिने असा एकूण एक लाख ६२ हजार रुपये किंमतीचा माल चोरून नेला आहे. भोकर पोलिस ठाण्यात गुन्हा नोंद केला असून, पोलिस उपनिरीक्षक श्री. कांबळे तपास करत आहेत.

याशिवाय गोविंद हुसेन्ना दुबेवाड (रा. नाईकनगर नांदेड) हेदेखील दिवाळीसणानिमित्त कुटुंबियांसह बाहेरगावी गेले होते. घरी परत आल्यानंतर त्यांना घराचे चॅनल गेट व दाराचे कुलुप तुटलेले दिसले. घरात जाऊन बघितले असताना ४० हजार रुपये किंमतीचे दोन लॅपटाॅप चोरट्यांनीचोरून नेल्याचे दिसले. गोविंद दुबेवाड यांनी दिलेल्या फिर्यादीवरून विमानतळ पोलिस ठाण्यात गुन्हा नोंद करण्यात आला. सहायक पोलिस उपनिरीक्षक श्री. कुरुळेकर तपास करत आहेत.