देगलूर (जि. नांदेड) : देगलूर-बिलोली विधानसभेच्या पोटनिवडणुकीसाठी शनिवारी सायंकाळी सात वाजेपर्यंत सरासरी ६५ टक्के मतदान झाले. यात १२ उमेदवारांचे भवितव्य मतदान यंत्रात बंद झाले असून काँग्रेस विरुद्ध भाजप अशी सरळ लढत या मतदारसंघात झाली.
सार्वजनिक बांधकाममंत्री व नांदेडचे पालकमंत्री अशोक चव्हाण यांनी या निवडणुकीत राजकीय शक्ती लावत महाविकास आघाडीतील अनेक मंत्र्यांना प्रचारात उतरविले होते.

दिवंगत आमदार रावसाहेब अंतापूरकर यांचे अकाली निधन झाल्यामुळे या मतदारसंघात पोटनिवडणूक झाली. अंतापूरकर यांचे चिरंजीव जितेश अंतापूरकर यांना काँग्रेसने उमेदवारी जाहीर केली होती. विविध मतदान केंद्रांवर सकाळपासून मतदारांची गर्दी होती. सायंकाळी सात वाजेपर्यंत सरासरी ६५ टक्के मतदान झाले.