नांदेड : राष्ट्रवादी काँग्रेसच्या ग्रामीण जिल्हाध्यक्षपदी पक्षाचे ज्येष्ठ कार्यकर्ते हरीहरराव भोसीकर यांची निवड करण्यात आली आहे. प्रदेशाध्यक्ष जयंत पाटील यांनी बुधवारी (ता. १६) मुंबई येथे पक्ष कार्यालयात भोसीकर यांना नियुक्ती पत्र दिले. 

माजी आमदार बापूसाहेब गोरठेकर यांनी राष्ट्रवादी काँग्रेसची हाताची घडी बाजूला ठेवून त्यांनी ऐनवेळी लोकसभा निवडणुकीत भाजपचे कमळ हाती घेतले होते. त्यानंतर गेले वर्षभर हे पद रिक्त होते. मध्यंतरी काही काळ माजी मंत्री कमलकिशोर कदम यांच्यावर जिल्हाध्यक्ष (ग्रामीण) पदाची जबाबदारी टाकली होती. त्यानंतर पक्ष निरीक्षकांना पाठवून पक्षाने जिल्हाध्यक्षपदाच्या निवडीबाबत चाचपणी केली होती. जिल्हाध्यक्षपदासाठी अनेकांनी गुडघ्याला बाशींग बाधले होते. 

हेही वाचा - नांदेड : सशस्त्र सेना ध्वजदिन निधीसाठी आता क्यूआर कोडची सोय, जिल्ह्यातील पहिला उपक्रम -

मात्र अखेर हरिहरराव भोसीकर यांना बुधवारी मुंबई येथे पक्ष कार्यालयात पक्षाचे प्रदेशाध्यक्ष जयंत पाटील यांनी जिल्हाध्यक्ष पदाचे नियुक्तीचे पत्र दिले. तत्पूर्वी राष्ट्रवादीचे नेते तथा उपमुख्यमंत्री अजित पवार, आरोग्य मंत्री राजेश टोरे तसेच ज्येष्ठ नेते कमलकिशोर कदम, पक्ष निरीक्षक अविनाश आदीक, प्रदेश सरचिटणीस शिवाजीराव गर्जे यांच्याशी चर्चा करुन जयंत पाटील यांनी नांदेड जिल्हाध्यक्ष ग्रामीण पदाच्या निवडी बाबत निर्णय घेतला. हरिहरराव भोसीकर यांच्या निवडीमुळे पक्षाने अल्पसंख्यांक लिंगायत समाजातील व्यक्तीला राष्ट्रवादी काँग्रेसच्या जिल्हाध्यक्षपदी नियुक्ती दिल्याने सर्वत्र आनंद व्यकक्त होत आहे. मागील काळापासून पक्षाला आलेली मरगळ काढून टाकण्यासाठी सर्वांना सोबत घेऊन काम करेल असा विश्वास श्री. भोसीकर यांनी व्यक्त केला.