नांदेड : जिल्ह्यातील शेतकरी आधीच यंदा झालेल्या अतिवृष्टीतून सावरत रब्बी हंगामाच्या तयारीला लागले आहेत. खरीप हंगामातील तूर पीक कसेतरी वाचविले असता हे पीक घरी येईल, या आशेवर आस लावून शेतकरी होते. मात्र गत दोन दिवसांपासून असलेल्या ढगाळ वातावरणाने जिल्ह्यातील शेतकरी पुन्हा संकटात सापडले आहेत.

खरीप हंगामातील सर्वच पिकांचा नायनाट झाला. प्रमाणापेक्षा जास्त पडलेल्या पावसाने खरिपातील कापूस, सोयाबीन, कडधान्यासह कपाशीतील मिश्र पिकांची नासाडी झाली. तरीही शेतकऱ्याने हार न मानता नव्याने रब्बी पिकासाठी आपले कंबरडे कसून पिकांच्या पेरणीची तयारी केली. परंतु, तूर पीक ऐन फुलोऱ्यावर असताना तीन ते चार दिवसांपासून असलेले ढगाळ वातावरण पुन्हा शेतकऱ्यांची चिंती वाढवत आहे. ढगाळ वातावरणामुळे तूर आणि हरभरा पिकावर विविध किडींचा प्रादुर्भाव दिसून येत आहे. या रोगांच्या नियंत्रणासाठी फवारणी करण्यासाठी शेतकऱ्यांना आर्थिक भुर्दंड सोसावा लागत आहे.

शेतकरी म्हणतात

फवारणीसाठी महागडी कीटकनाशके खरेदी करण्यास पैशांअभावी पुन्हा अडचण येणार आहे. खरीप हंगामातील जास्त पावसाने सर्वच पिकांचा नायनाट केला. सरकारची नुकसान भरपाई ही पेरणीला देखील पुरली नाही. त्यामुळे सर्वच शेतकरी पुन्हा संकटात सापडले आहेत.

- रावसाहेब गावंडे, शेतकरी

ढगाळ वातावरणामुळे हरभरा पिकावरही विविध रोगांचा प्रादुर्भाव दिसून येत आहे. त्यामुळे नेमके पीक तरी कोणतं घ्यावं ही समस्या सर्वच शेतकऱ्यांसमोर उभी ठाकली आहे.

- वामनराव गोराडे पाटील, शेतकरी

ढगाळ वातावरणामुळे तूर, हरभरा, कापूस, कांदा, भाजीपाला आदी पिकांना मोठा फटका बसण्याची शक्यता आहे. वातावरणातील बदलामुळे शेतातील तूर पिकावर दव जात असून, उभे पीक वाळल्यागत झाले आहे.

- सुलोचनाबाई पाथरडकर, शेतकरी