माहूर : राज्यात मागच्या वर्षी चांगला पाऊस झाल्याने शेतक-यांच्या पिकाचे उत्पादन देखील चांगल्या प्रकारे झाले तरी राज्य शासनाने शेतक-यांना त्यांच्या शेतमालाला हमीभाव मिळावा, या उद्देशाने रब्बी हंगामातील हरभरा या पिकाच्या खरेदीची प्रक्रिया विविध संस्था व शासकीय यंत्रणे मार्फत सुरु केली आहे. ज्यामध्ये ता. १६ फेब्रुवारीपासून हरभरा या पिकाची ऑनलाइन नोंदणी प्रक्रिया सुरु करण्यात आली तर प्रत्यक्ष खरेदी ही ता. एक मार्चपासून सुरु करण्यात आली. परंतु सहकार व पणनमंत्री यांच्या दालनात झालेल्या ता. ११ मे रोजीच्या बैठकीत घेतलेल्या निर्णयानुसार ता. १७ मेपासून ऑनलाइन नोंदणी बंद करण्यात आली आहे. तर ता. २९ मे रोजी प्रत्यक्ष खरेदी बंद करण्यात येणार आहे, असा निर्णय घेण्यात आला आहे.

मात्र, या निर्णयामुळे ऐन पावसाळ्याच्या व पेरणीच्या तोंडावर शेतकरी अडचणीत सापडला आहे. त्यामुळे शेतक-यांच्या समुहाने व किनवट माहुर तालुक्यात कार्यरत असलेल्या फार्मर प्रोड्युसर कंपनी तथा ज्याव्दारे शेतक-यांचे पिक खरेदी केले जात आहे अशा नाफेडच्या प्रतिनिधींनी रब्बी हंगामासाठी हरभरा पिक खरेदी करण्यासाठी आवश्यक असलेली ऑनलाइन नोंदणीची मुदत वाढवुन देण्याची मागणी केली आहे.

शेतक-यांची अडचण पाहता या ऑनलाइन नोंदणीच्या मुदतवाढीसाठी विविध शेतक-यांच्या समुहाने हिंगोली लोकसभा क्षेत्राचे खासदार हेमंत पाटील यांच्याकडे देखील मुदत वाढवून देण्यासंदर्भात शासनाकडे पाठपुरावा करण्याची विनंती एका निवेदनाव्दारे केली आहे. सध्या लग्नसराईचे दिवस, प्रचंड उष्णता, मजुरांची कमतरता यामुळे शेतक-यांना आपले शेतातील पिक योग्य वेळी खरेदी केंद्रावर नेता आले नाही तर यात ऑनलाइनच्या फे-यामुळे निरक्षर शेतक-यांना योग्य वेळी ऑनलाइन नोंदणी करणे शक्य झाले नाही, परंतु आता राज्याच्या पणन व सहकारमंत्र्याच्या आदेशामुळे शेतकरी हतबल झाले असून रब्बी हंगाम २०२१ - २२ साठी हरभरा खरेदीची ऑनलाइन नोंदणीची मुदत वाढवून देण्याची मागणी किनवट माहुर तालुक्यातील शेतक-यांनी केली आहे.