नांदेड : जिल्हा न्यायालयातील एका न्यायाधीशांचा अंगरक्षक अपघातात ठार झाल्याची घटना नांदेड ते सिडको रस्त्यावर मातोश्री मंगलकार्यलयासमोर मंगळवारी (ता. २९) रात्री साडेआठच्या सुमारास घडली. या घटनेनंतर पोलिस दलात हळहळ व्यक्त होत होती. 

पोलिस मुख्यालयातील व सध्या जिल्हा न्यायालयातील जिल्हा तदर्थ न्यायाधीश (दुसरे) यांचे अंगरक्षक म्हणून कार्यरत होते. ते आपले कर्तव्य बजावून रात्री दुचाकी (एमएच२६-२४९९) वरुन सिडकोकडे जात होते. त्यांची दुचाकी ही रात्री साडेआठच्या सुमारास नांदेड ते सिडको रस्त्यावर असलेल्या मातोश्री मंगलकार्यालयाजवळ जाताच त्यांच्या दुचाकीला अपघात झाला. अपघातात त्यांच्या डोक्याला जबर दुखापत झाली. रक्तश्राव झाल्याने ते बेसुद्ध पडले. लगेच काही नागरिकांनी त्यांना विष्णुपूरी येथील शासकिय रुग्णालयात दाखल केले. मात्र उपचार सुरु होण्यापूर्वीच त्यांचा मृत्यू झाल्याचे रुग्णालय सुत्रानी जाहीर केले. 

हेही वाचा - नांदेड : नूतन वर्षाचे स्वागत अत्यंत साधेपणाने करा- जिल्हाधिकारी डाॅ. विपीन इटनकर -

पोलिस शिपाई विद्याधन एकनाथ ढेंबरे (वय ३५) हा २०१० मध्ये पोलिस दलात रुजु झाला होता. त्याने यापूर्वी कंधार पोलिस ठाण्यात सेवा केली होती. मागील दीड वर्षांपूर्वी त्यांची बदली पोलिस मुख्यालयात झाली. तेंव्हापासून ते जिल्हा न्यायाधीश (दुसरे) यांच्याकडे अंगरक्षक म्हणून कार्यरत होते. मंगळवारी रात्री साडेआठ वाजताच्या सुमारास ते आपल्या दुचाकीरुन जात असताना हा अपघात घडला होता. अत्यंत मनमिळाऊ व्यक्तिमत्त्व अशी विद्याधन ढेंबरे यांची ख्याती होती. या प्रकरणी नांदेड ग्रामिण पोलिस ठाण्यात आकस्मिक मृत्यूची नोंद झाली असून नेमका अपघात कसा झाला याचा शोध घेत असल्याचे पोलिस निरीक्षक प्रशांत देशपांडे यांनी सांगितले.