नांदेड : महापालिकेचे (Nanded Municipal Corporation) उत्पन्न वाढविण्यावर अधिकारी आणि कर्मचाऱ्यांनी विशेष लक्ष द्यावे त्याचबरोबर अनावश्यक खर्च टाळण्याच्या सूचनाही स्थायी समितीचे सभापती किशोर स्वामी यांनी सोमवारी (ता. २७) केल्या. शहरात सुरू असलेल्या अनधिकृत बांधकामास आळा घालण्यासाठीही उपाययोजना करण्याच्या सूचना त्यांनी महापालिका प्रशासनास दिल्या.

महापालिकेच्या स्थायी समिती सभागृहात सभापती स्वामी यांच्या अध्यक्षतेखाली सभा घेण्यात आली. यावेळी उपायुक्त तथा नगरसचिव अजितपालसिंघ संधू, शुभम क्यातमवार, अतिरिक्त आयुक्त गिरीश कदम, माजी सभापती विरेंद्रसिंग गाडीवाले, बालाजी जाधव, कविता मुळे, राजू काळे, मुख्य लेखाधिकारी तुकाराम भिसे यांच्यासह सदस्य, अधिकारी, विभागप्रमुख उपस्थित होते. यावेळी तेरा प्रस्तावावर चर्चा करण्यात आली आणि सवार्नुमते त्यास मंजुरी देण्यात आली.

या सभेत प्लॅस्टिक बंदी, अतिक्रमण, पाणीपुरवठा, गुंठेवारी, बांधकाम परवानगी, कोरोना व आरोग्य विभाग, आकृतीबंध आदी विषयावर चर्चा करण्यात आली. नळ तपासणी आणि चुकीचे बिल याबबात तत्काळ सर्व्हेक्षण करण्याच्या सूचना सभापती स्वामी यांनी दिल्या. मुख्य प्रवेशद्वाराजवळ महापालिका स्वागत कक्षाकडे जाणारा मार्ग दर्शविणारा फलक लावण्याच्या सूचना त्यांनी केल्या.

महापालिकेत सध्या किती अधिकारी, कर्मचारी कामावर आहेत, याची माहिती घेऊन आकृतीबंध संबंधी सभापतींनी माहिती घेतली. त्याचबरोबर कामात प्रगती करा. महापालिकेत बायोमेट्रिक मशीन बसवा, कर भरणाऱ्या नागरिकांना धन्यवाद संदेश द्या, वीज पुरवठा सुरळीत ठेवा तसेच किरकोळ दुरूस्तीची कामे तत्काळ पूर्ण करा, अशा सूचनाही त्यांनी दिल्या.