हिमायतनगर : नांदेड पाठोपाठ आता ग्रामीण परिसरात सुद्धा गुन्हेगारीचे प्रमाण वाढले असून हिमायतनगर तालुक्यातील सरसम येथील दोन युवकाकडून दोन गावठी कट्टे येथील स्थानिक पोलिसांनी जप्त केले असून कट्टे जप्त करण्याची तालुक्यातील हि पहिल्याच कारवाई आहे. ही कारवाई बुधवारी दुपारी करण्यात आली.

नांदेड जिल्हा पोलिस अधीक्षक प्रमोदकुमार शेवाळे यांनी दिलेल्या सूचनेनंतर हिमायतनगर शहर व परिसरात पोलिस निरीक्षक बी.डी. भुसनुर यांच्या मार्गदर्शनाखाली गस्त सुरु आहे. दरम्यान हगस्तीच्या कामात असलेले एपीआय नंदलाल चौधरी यांच्या पथकाने सरसम येथे जाऊन अत्यंत गोपनीय पद्धतीने निखिल देशमुख आणि विकास ताडेवाड यां दोघांना ताब्यात घेतले. अगोदर निखील देशमुख याची अंगझडती घेतली असता त्याच्याकडे एक पिस्तूल आढळून आले.

चौकशीअंती हे पिस्टल अवैद्य असल्याचे समजल्यानंतर पोलिसांनी अन्य साहित्य जप्त करून या दोघांना अटक करण्यात आली. ही कारवाई बुधवारी (ता.२२) जून रोजी दुपारी साडेबारा वाजेच्या सुमारास हिमायतनगर तालुक्‍यातील सरसम येथे करण्यात आली असल्याचे पोलिस सूत्रांनी सांगितले. नांदेड जिल्ह्यातील हिमायतनगर तालुक्‍यातील मौजे सरसम येथील संशयित निखिल संदीप देशमुख (वय २४) आणि विकास दत्ता ताडेबाड (वय २०) हे दोघेजण विनापरवाना स्वतःजवळ पिस्तुल बाळगून परिसरात दहशत माजवीत असल्याची गुप्त माहिती हिमायतनगर पोलिस ठाण्याचे पोलिस निरीक्षक भुसनुर यांना मिळाली होती.

यावरून त्यांनी आपले सहकारी अधिकारी सहायक पोलिस निरीक्षक नंदलाल चौधरी यांना सूचना केली. यावरून सहायक पोलिस निरीक्षक नंदलाल यांनी, पोलिस कोमल कागणे, पवन चौदंते, जिंकलवाड आणि कुलकर्णी यांना सोबत घेऊन कार्यवाही केली. यात हत्यारासह दोघांना अटक केली आहे. याबाबत नंदलाल चौधरी यांच्या फिर्यादीवरून निखिल देशमुख आणि विकास ताडेवाड यांच्याविरुद्ध भारतीय हत्यार कायद्याप्रमाणे गुन्हा दाखल करण्यात आला. या प्रकरणाचा अधिक तपास महिला पोलिस हवालदार कोमल कागणे या करत आहेत.