बिलोली  (जिल्हा नांदेड) :  बिलोली तालुक्यातील महत्त्वाची ग्रामपंचायत म्हणून ओळख असलेल्या आरळी ग्रामपंचायतीच्या सरपंच पदाची सूत्रे उच्चशिक्षित राजेश्री प्रकाश लाकडे यांच्याकडे देण्यात आली. विशेष म्हणजे येत्या सोमवारी (ता. १५) ती विवाह बंधनात अडकणार आहे. लग्नापूर्वीच सरपंच पदाचीमाळ गळ्यात पडलेल्या राजश्रीला मात्र यापुढे दुहेरी भूमिका बजावावी लागणार आहे.

बिलोली तालुक्यातील आरळी ग्रामपंचायतीची निवडणुक यंदा अतिशय चुरशीची झाली. येथील काँग्रेस पक्षाचे अनुभवी व ज्येष्ठ राजकारणी हाजप्पा पाटील सुंकलोड यांच्या पॅनलचा दारुण पराभव करुन पंचायत समितीचे माजी उपसभापती दत्ताराम पाटील बोधने व शिवा संघटनेचे सक्रिय कार्यकर्ते सदाशिव पाटील बोडके यांच्या पॅनलचा दणदणीत विजय झाला.

हेही वाचा - पाच हजाराची लाच घेणाऱ्या कृषी पर्यवेक्षकास अटक; धर्माबाद येथील घटना

लाॅकडाऊनच्या काळात बोडके परिवारातील जगदीश गंगाधर बोडके व जयश्री प्रकाशराव लाकडे या दोघांच्या रेशीमगाठी जुळल्या. त्याचा पुरेपूर फायदा घेत लाकडे, बोधने व बोडके या परिवारांनी एकत्र येऊन पदव्युत्तर शिक्षण प्राप्त केलेल्या राजश्री हिस नागरिकांचा मागास प्रवर्गातून सरपंच पदाचे दावेदार म्हणून निवडणूक रिंगणात उतरविले. निवडणुकीमध्ये तिचा दणदणीत विजयी झाला. जगदीश बोडके व राजश्री लाकडे यांचा येत्या सोमवारी विवाह सोहळा संपन्न होणार आहे.

तत्पूर्वीच मंगळवारी (ता. नऊ) आरळी येथील सरपंच व उपसरपंच पदाच्या निवडी जाहीर झाल्या. त्यात राजश्री प्रकाशराव लाकडे यांची बिनविरोध सरपंचपदी निवड झाली. उपसरपंच पदाची धुरा संजय शंकरराव नरहरे यांच्याकडे सोपविण्यात आली आहे. पंचायत समितीचे माजी उपसभापती दतराम पाटील बोधने व युवा कार्यकर्ते सदाशिव पाटील बोडके यांच्या मार्गदर्शनाखाली लाकडे परिवारातील राजश्री लाकडे यांना बोडके परिवाराची सून म्हणून तसेच गावातील सरपंच म्हणून आपल्या कामाची वेगळी ओळख निर्माण करावी लागणार आहे. या निवडीबद्दल शिवा संघटनेचे संस्थापक अध्यक्ष प्राध्यापक मनोहर धोंडे, भाजपचे जिल्हा सरचिटणीस तथा जिल्हा परिषद सदस्य लक्ष्मण ठक्करवाड आदींनी शुभेच्छा दिल्या आहेत.

संपादन- प्रल्हाद कांबळे