नांदेड : आपल्या सर्व सहकाऱ्यांना सोबत घेऊन कोरोनाच्या पहिल्या लाटेत कोरोना संसर्गाला जवळ न येऊ देता कोट्यवधी रुपयांचा महसूल जमा केला. मात्र अखेर दुसऱ्या लाटेत खुद्द राज्य उत्पादन शुल्क विभागाचे अधीक्षक निलेश सांगडे यांना कोरोनाने घेरले आणि ते कोरोना बाधीत झाले. ते सध्या वैद्यकीय सल्ल्यानुसार होम क्वारंटाईन आहेत. मात्र त्यांच्या प्रकृतीवर डाॅक्टर लक्ष ठेवून आहेत. 

जिल्ह्यात सध्या कोरोनाचा प्रादुर्भाव मोठ्या प्रमाणात वाढत असल्याने प्रत्येकाने काळजी घेणे तितकेच महत्त्वाचे आहे. कोरोनाचा संसर्ग वाढू नये व या संसर्गाची साखळी तुटावी म्हणून जिल्हाधिकारी डॉ. विपीन सतत परिस्थितीवर लक्ष ठेवून असून पालकमंत्री अशोक चव्हाण यांच्या सल्ल्यानुसार ता. 25 मार्च पासून ता.चार एप्रिलपर्यंत जिल्हाभरात लाॅकडाऊन जाहीर केले आहे. यामध्ये अत्यावश्यक सेवा वगळता सर्व सेवा बंद ठेवण्यात येणार आहेत. नांदेडकरांनी प्रशासनाच्या आवाहनाला प्रतिसाद देत कोरोनाची साखळी तोडावी असे आवाहन त्यांनी केले आहे. 

हेही वाचा - हिंगोली : छंदी पत्रकाराला महिला रुग्नालयातील चित्रिकरण भोवले; डॉक्टरांच्या तक्रारीवरुन पोलिसात गुन्हा

राज्य उत्पादन शुल्क विभागाचे जिल्हा अधीक्षक निलेश सांगडे यांना नुकतीच कोरोनाची बाधा झाली आहे. ते आपल्या पथकासह जिल्हाभरात विविध ठिकाणी अवैध देशी दारु, हातभट्टी विक्री करणाऱ्याविरुद्ध कारवाई करण्याची मोहीम राबवित असतात. यातच त्यांना दोन दिवसापासून प्रकृतीत बिघाड दिसून आल्याने त्यांनी सरकारी रुग्णालयात जाऊन कोरोना चाचणी केली. या चाचणीत ते कोरोना पॉझिटिव आढळले. या नंतर कार्यालयात एकच खळबळ उडाली आहे. यापूर्वी याच कार्यालयातील दुय्यम निरीक्षक भगवान मंडलवार यांनाही कोरोनाची बाधा झाली होती. त्यांनी यावर मात करत आपल्या सेवेला सुरुवात केली आहे. त्याप्रकारे निलेश सांगडे हेही या संकटावर मात करुन आपल्या सेवेत रुजू होतील असा विश्वास सहकाऱ्यांनी व्यक्त केली आहे.

संपर्कात आलेल्यांनी तपासणी करावी- सांगडे

कोरोना बाधीत झालेल्या श्री. सांगडे यांनी आपल्या सर्व सहकाऱ्यांना आवाहन केले आहे की, माझ्या संपर्कात आलेल्या सर्वांनी कोरोना तपासणी करुन घ्यावी. कुठलाही ताप किंवा खोकला अंगावर काढू नका, आपली व आपल्या परिवाराची काळजी घ्या असे आवाहन त्यांनी केले आहे. 
- निलेश सांगडे, जिल्हा अधिक्षक, राज्य उत्पादन शुल्क विभाग, नांदेड.