नांदेड : राज्यातील सर्व शिक्षक कर्मचाऱ्यांना जुनी पेन्शन (old pension) लागू व्हावी तसेच शिक्षकांच्या इतर प्रलंबीत मागण्याकडे शासनाचे लक्ष वेधण्यासाठी अखिल महाराष्ट्र प्राथमिक शिक्षक (Akhil Maharashtra Primary Teacher) संघाच्या वतीने सोमवारी (ता. २७) जिल्हाधिकारी कार्यालयासमोर धरणे आंदोलन करण्यात आले.राज्यात २००५ नंतर सेवेत आलेल्या सर्व शिक्षक कर्मचाऱ्यांना जुनी पेन्शन योजना लागू करावी.

सातव्या वेतन आयोगातील त्रुटी दूर करून खंड दोन प्रकाशित करण्यात यावा, नवीन शैक्षणिक धोरणाला शिक्षण व शिक्षक विरोधी तरतुदी वगळाव्यात, समानकाम समान वेतन या न्यायाला धरून शिक्षणसेवक योजना रद्द करणे, सर्व विषय शिक्षकांना पदवीधर वेतश्रेणी लागू करणे, एम.एस.सी. आयटी मुदत वाढविणे, राज्याच्या शिक्षण विभागातील सर्व रिक्त पदे भरणे, केंद्रप्रमुखांची सर्व रिक्तपदे शिक्षकांतून पदोन्नतीने भरणे, नांदेड जिल्हा परिषदेतील जीपीएफ स्लिपमधील गोंधळ दूर करणे, १२ वर्ष सेवा पूर्ण सर्वाचे चटोपाध्याय वेतश्रेणीचे आदेश काढणे, वर्षानुवर्ष रखडलेली वरिष्ठ वेतश्रेणी सुरू करणे, सहाव्या वेतन आयोगातील हप्ते जमा करणे, वस्ती शाळा शिक्षकांना मुळ नियुक्तीपासून सेवा ज्येष्ठतेचा लाभ मिळावा, रखडलेल्या अंतरजिल्हा व जिल्हांतर्गत बदल्या व्हाव्यात आदी मागण्यांसाठी जिल्हाधिकारी कार्यालयासमोर सोमवारी धरणे आंदोलन करण्यात आले.

या आंदोलनात संघटनेचे राज्य संयुक्त चिटणीस दिलीप देवकांबळे, राज्य संघटक चंद्रकांत मेकाले, जिल्हाध्यक्ष अशोक पाटील, सरचिटणीस प्रल्हाद राठोड, कार्याध्यक्ष सुधाकर थडके, कोषाध्यक्ष उमाकांत मैलारे, तुकाराम जाधव यांच्यासह शिक्षक, कर्मचारी आदी सहभागी झाले होते. आंदोलनानंतर शिष्टमंडळाच्या वतीने मागण्यांचे निवेदन जिल्हाधिकारी कार्यालयात सादर करण्यात आले.