नांदेड - नांदेड वाघाळा महापालिकेची शुक्रवारी दुपारी तीन वाजता झालेल्या सभेत अनेक विषयांवर चर्चा होऊन गदारोळ आणि गोंधळही झाला. आरोप - प्रत्यारोपांच्या फैरी झडल्या. दरम्यान, काय ते रस्ते, काय ते खड्डे, काय ती टक्केवारी असे म्हणत नगरसेवक बापूराव गजभारे यांनी महापौरांच्या दिशेने पत्रक भिरकाऊन सभात्याग केला. त्यामुळे त्यांना पुढील दोन सभेसाठी निलंबित करण्यात आले. सभागृहात अधिकाऱ्यांकडून केवळ खुलासे सादर होत असल्याने महापौर जयश्री पावडे यांनी प्रशासनावर संताप व्यक्त केला.

महापालिकेच्या डॉ. शंकरराव चव्हाण सभागृहात दुपारी तीन वाजता महापौर पावडे यांच्या अध्यक्षतेखाली सभा सुरू झाली. यावेळी उपमहापौर अब्दुल गफार, अतिरिक्त आयुक्त बाबासाहेब मनोहरे, सभागृह नेते ॲड. महेश कनकदंडे, विरोधी पक्षनेते दीपकसिंह रावत, नगरसचिव अजितपालसिंग संधू आदींसह पदाधिकारी व सदस्य उपस्थित होते. आयुक्त डॉ. सुनील लहाने मुंबईला गेल्यामुळे गैरहजर होते. प्रारंभी स्थायी समितीचे सभापती किशोर स्वामी यांचे वडील मल्लीकार्जुन स्वामी यांचे निधन झाल्यामुळे त्यांना श्रद्धांजली अर्पण करण्यात आली.

मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या अभिनंदनाचा ठराव विरोधी पक्षनेते रावत यांनी मांडला पण तो महापौर पावडे यांनी फेटाळून लावत पुढच्या सभेत घेऊ असे सांगितले. त्यानंतर शहरातील विविध समस्यांच्या प्रश्नांनी सुरूवात झाली. त्यात प्रशासन कोणतीच कामे वेळेत मार्गी लावत नसल्याच्या तक्रारी सदस्यांनी केल्या. पाणीपुरवठ्यासह मुलभूत सुविधा मिळत नसल्याच्या तक्रारी यावेळी करण्यात आल्या.

यावेळी संबंधित अधिकाऱ्यांकडून खुलासे करण्यात आले मात्र त्यावर सदस्यांचे समाधान झाले नाही. त्यामुळे महापौर पावडे याही संतप्त झाल्या. नागरिकांना वेठीस धरणाऱ्या सन्मान कंपनीविरूद्ध कारवाई करा अशा सूचना त्यांनी दिल्या. सभा झाल्यानंतर आयुक्तांशी चर्चा करून पदाधिकारी आणि सदस्यांच्या भावना कळविण्यात येतील, असे अतिरिक्त आयुक्त श्री. मनोहरे यांनी सांगितले.