नांदेड : जिल्हा परिषदेतील प्राथमिक शिक्षकांच्या जिल्हांतर्गत व आंतरजिल्हा बदल्यांना लवकरच मुहूर्त लागण्याची शक्यता असून यासाठी आॅनलाइन प्रणाली विकसीत करण्यात आली आहे. या प्रणालीच्या अनुषंगाने आज बुधवारी राज्यातील सर्व जिल्हा परिषदेच्या मुख्य कार्यकारी अधिकारी यांचे आॅनलाईन प्रशिक्षण होणार आहे.

मागच्या महिन्यात जिल्हा परिषदेतील विविध संवर्गातील कर्मचाऱ्यांची बदली प्रक्रिया समुपदेशन पद्धतीने पार पडली. मुख्य कार्यकारी अधिकारी तथा प्रशासक म्हणून वर्षा ठाकूर-घुगे यांच्या निगराणीत ही प्रक्रिया पारदर्शकपणे पूर्ण करण्यात आली. यानंतर आता जिल्हा परिषदेतील प्राथमिक शिक्षकांच्या बदल्या कधी होतील, याकडे लक्ष लागले होते. या बदल्यांच्या हालचालींना वेग आला आहे.

दरम्यान, जिल्हा परिषद शिक्षकांच्या जिल्हांतर्गत, आंतरजिल्हा बदल्यांसाठी ता. सात एप्रिल २०२१ च्या दोन स्वतंत्र शासन निर्णयान्वये सुधारित धोरण विहित करण्यात आले आहे. सदर धोरणातील आवश्यक त्या तरतुदीनुसार कार्यवाही करण्याबाबत जिल्हा परिषदेच्या मुख्य कार्यकारी अधिकारी यांना वेळोवेळी निर्देश देण्यात आले आहेत. त्या धोरणातील अनुषंगाने जिल्हा परिषदेतील प्राथमिक शिक्षकांच्या आंतरजिल्हा बदल्यांसाठी आॅनलाइन प्रणाली विकसित करण्यात आली असून, २०२२ मधील बदल्या आॅनलाइन प्रणालीद्वारे करण्यात येणार आहेत.

सदर प्रणालीमध्ये प्रत्यक्ष चालणाऱ्या कामकाजाच्या अनुषंगाने आज सकाळी अकरा ते एक या वेळेत जिल्हा परिषदेच्या मुख्य कार्यकारी अधिकारी यांचे आॅनलाइन प्रशिक्षण आयोजित केले आहे. त्यांच्यासोबत जिल्हा परिषदेच्या सामान्य प्रशासन विभागाचे उपमुख्य कार्यकारी अधिकारी यांनाही उपस्थित राहण्याच्या सुचना ग्रामविकास विभागाचे उपसचिव दळवी यांनी मंगळवारी (ता. सात) दिल्या आहेत. शासनाच्या या निर्देशामुळे शिक्षकांच्या बदल्यांना लवकरच मुहूर्त लागेल असे दिसून येत आहे.