नांदेड : शहर आणि परिसराला मंगळवारी (ता. ११) सायंकाळी सहा ते सात या एका तासात मुसळधार पावसाने झोडपले. जोरदार आलेल्या पावसामुळे सखल भागात मोठ्या प्रमाणावर पाणी साचले. अनेकांच्या घरातही पाणी शिरल्याने नागरिकांचे हाल झाले.

यंदाच्या वर्षी शहर आणि जिल्ह्यात पावसाचे प्रमाण जास्तच होते. शंभर टक्क्याहून अधिक पाऊस जिल्ह्यात यंदा झाला आहे. या पावसामुळे शेतकऱ्यांच्या पिकांचेही मोठे नुकसान झाले आहे. परतीच्या पावसानेही पुन्हा मोठे नुकसान होणार आहे. गेल्या आठवडाभरापासून कमी अधिक प्रमाणात पाऊस सुरूच आहे. मंगळवारी दिवसभर आभाळ भरून आले होते. सायंकाळी सहा वाजता विजेच्या कडकडाटासह जोरदार पाऊस झाला. हा पाऊस तब्बल एक तास सुरू होता.

जिल्ह्यात जून महिन्यामध्ये खरिपांच्या पेरण्या झाल्या. त्यानंतर जुलैमध्ये तुफान पर्जन्यवृष्टी झाल्यामुळे पूरस्थिती निर्माण होऊन सखल तसेच नाल्याकाठच्या शेतातील पिकांचे मोठ्या प्रमाणात नुकसान झाले. यात पाच लाख १८ हजार हेक्टरवरील जिरायती, बागायती व फळपिकांचे ३३ टक्क्यांपेक्षा अधीक पिकांचे नुकसान झाले. या नैसर्गिक आपत्तीचा फटका सात लाखांपेक्षा अधीक शेतकऱ्यांना बसला.

यंदाच्या वर्षी शेतकऱ्यांना सतत संकटाचा सामना करावा लागला. या आपत्तीतून शिल्लक राहिलेले सोयाबीनचे पिक सध्या काढणीला आले असताना शहरासह जिल्ह्याच्या विविध भागात पावसाने हजेरी लावली आहे. त्याचबरोबर

कापूस पिकाचेही नुकसान झाले आहे. पावसामुळे कापणी केलेल्या सोयाबीन पिकांचे नुकसान होत असल्याने शेतकरी धास्तावले आहेत. कापणी केलेले सोयाबीन अनेक ठिकाणी पावसाने भिजले आहे. परिणामी धान्याला मोड फूटून नुकसान होत असल्याने ते पिक झाकण्यासाठी शेतकऱ्यांची धावाधाव सुरू आहे. सततच्या पावसामुळे शेतकरी देखील हतबल झाले आहेत.

रस्त्यावरील पाणी घरात शिरले

शहरात झालेल्या मुसळधार पावसामुळे अनेक ठिकाणी सखल भागात रस्त्यावरील पावसाचे पाणी अनेकांच्या घरात शिरले. त्यामुळे नागरिकांची तारांबळ उडाली. अनेकांच्या घरातील साहित्यही भिजले. सध्या शहरातील अनेक भागात सिमेंटचे रस्ते तयार करण्याचे काम सुरू आहे. हे रस्ते उंच झाल्यामुळे आणि पाण्याचा निचरा होत नसल्यामुळे अनेक गल्लीबोळात पाणी साचून तळे तयार झाले होते. त्यातून वाहनधारकांनी वाट काढावी लागली. सततच्या पावसामुळे नागरिकही वैतागले आहेत.