नवीन नांदेड ः स्वामी रामानंद तीर्थ मराठवाडा विद्यापीठातील शिक्षकेतर कर्मचारी सातवा वेतन आयोग, सुधारित आश्वासित प्रगती योजना पुनर्जीवित करणे आणि इतर प्रलंबित मागण्यांसाठी महाराष्ट्र राज्य महाविद्यालयीन व विद्यापीठीय सेवक संयुक्त कृती समितीतर्फे गुरुवारपासून (ता. २४) पुकारलेल्या राज्यव्यापी लेखणी-अवजार बंदसह ठिय्या आंदोलन करणार आहेत.

शिक्षकेतर कर्मचारी सहभागी 
राज्यातील सर्वच कर्मचाऱ्यांना सातवा वेतन आयोग लागू करण्यात आला आहे. पण राज्यातील सर्व अकृषी विद्यापीठातील कर्मचाऱ्यांना सातवा वेतन आयोग लागू केलेला नाही. यामुळे महाराष्ट्रातील सर्व अकृषी विद्यापीठातील शिक्षकेतर कर्मचाऱ्यांमध्ये संतापाची लाट उसळलेली आहे. यापूर्वी अनेक निवेदनाद्वारे, आंदोलनाद्वारे वेळोवेळी प्रशासनाच्या व शासनाच्या निर्देशनास सदर बाब आणून दिली आहे, तरीही शासनदरबारी याबाबत उदासीनता दिसून येत आहे. स्वामी रामानंद तीर्थ मराठवाडा विद्यापीठ अधिकारी व कर्मचारी कृती समितीच्या वतीने १८ सप्टेंबरपासून सुरू केलेल्या काळ्याफिती लावून कामकाज आंदोलनामध्ये विद्यापीठातील सर्व शिक्षकेतर कर्मचारी सहभागी झाले आहेत. हेच कर्मचारी आता अवजार बंदसह ठिय्या आंदोलन करणार आहेत. 

हेही वाचा -  नांदेडला औषधोपचारानंतर दहा हजार रूग्ण झाले बरे... -

पाच दिवसांचा आठवडा 
सातवा वेतन आयोगाशिवाय सुधारित आश्वासित प्रगती योजना पुनर्जीवित करणे, पाच दिवसांचा आठवडा लागू करणे आणि इतर प्रमुख प्रलंबित मागण्यांसह अजूनही काही मागण्यांचा उल्लेख या कृती समितीच्या मागण्यांमध्ये आहे. या मागण्यांचे निवेदन कुलगुरू डॉ. उद्धव भोसले यांच्याकडे देण्यात आले. यावेळी स्वामी रामानंद तीर्थ मराठवाडा विद्यापीठ कृती समितीचे अध्यक्ष काळबा हनवते, सचिव तथा उपकुलसचिव हुशारसिंग साबळे, अधिकारी फोरमचे अध्यक्ष डॉ.अशोक कदम, अधिसभा सदस्य उद्धव हंबर्डे, माजी अधिसभा सदस्य शिवराम लुटे, गोविंद हंबर्डे, शिवाजी चांदणे, संदीप एडके, तुकाराम हंबर्डे, प्रमोद देशमुख यांच्यासह अधिकारी, कर्मचारी उपस्थित होते. 

परीक्षा लांबणीवर पडणार काय? 
थोड्याच दिवसात विद्यापीठाच्या परीक्षा येत आहेत आणि त्यातच कर्मचाऱ्यांच्या आंदोलनामुळे परीक्षा लांबणीवर पडतात की काय? असा सूर विद्यार्थी वर्गातून निघत असून, विद्यापीठासमोर नवा पेच निर्माण झाला आहे. 

संपादन - स्‍वप्निल गायकवाड