Nanded News : इतवारा ठाण्याच्या गुन्हे शोध पथकाने दोघांना अटक करून त्यांच्याकडून एक गावठी पिस्तूल, एक जिवंत काडतूस, एक तलवार आणि चाकू जप्त केला आहे. आवेस सय्यद खलील (वय २४) आणि शेख समीन ऊर्फ अरबाज शेख रौफ (वय २३) या संशयित आरोपींना अटक करण्यात आली आहे. ते दोघेही नांदेडमधील रहिवासी आहेत.

पोलिस अधीक्षक श्रीकृष्ण कोकाटे, अपर पोलिस अधीक्षक अबिनाश कुमार यांच्या आदेशाने रेकॉर्डवरील फरार आरोपींचा शोध घेऊन अवैध धंद्यांवर कारवाई करणे व संशयित हालचालींवर लक्ष ठेवण्याकरिता आदेशित केले होते. त्याप्रमाणे उपविभागीय पोलिस अधिकारी सुशीलकुमार नायक यांच्या मार्गदर्शनाखाली उपविभाग इतवारा गुन्हे शोध पथकातील पोलिस अंमलदार अर्जुन मुंडे, चंद्रकांत स्वामी, संतोष बेल्लुरोड,

हबीब चाऊस आणि श्रीराम दासरे यांनी १४ मे रोजी दुपारी देगलूर नाका परिसरातील कापूस संशोधन केंद्राच्या गेटजवळ वरील दोन्ही संशयित आरोपींना ताब्यात घेतले. त्यांच्याकडून एक गावठी पिस्तूल, एक जिवंत काडतूस, एक तलवार आणि एक चाकू अशी घातक हत्यारे जप्त करण्यात आली आहेत. या दोघांविरुद्ध इतवारा पोलिस ठाण्यात हत्यार कायद्याप्रमाणे गुन्हा दाखल करण्यात आला आहे.