नांदेड : राहायला सर्वसुविधायुक्त घर असावे, फिरायला कार असावी अशी अनेकांची इच्छा असते. परंतु, सध्या नवीन घराचे बांधकाम करण्यासाठी लागणाऱ्या साहित्याचे भाव गगनाला भिडल्याने अनेकांचे नवीन घराचे स्वप्न आजच्या घडीला महागाईच्या विळख्यात सापडले आहे. 

आधीच बांधकामाचे साहित्याचे वाढलेले भाव आता त्यात इंधन दरवाढीची भर पडली आहे. कारण इंधनाचे दर वाढल्याने वाहतुकीचा खर्च पण वाढला आहे. वाहतुकीचा खर्च वाढल्याने पर्यायाने बांधकाम साहित्याच्या दरात वाढ झाली. वाढत्या दराने बांधकाम व्यावसायींकावर मंदीचे ढग कोसळले आहे. 

इंधन दरवाढीने सर्व क्षेत्रात महागाईने डोके वर काढले आहे. मुद्रांक शुल्क कमी केलेले असले तरी बांधकाम साहित्याच्या दरावर मर्यादा आणण्यासाठी इंधनाचे दर देखील आटोक्यात आणण्यासाठी सरकारने प्रयत्न करावे, अशी मागणी बांधकाम व्यावसायिकांकडून करण्यात येत आहे. दिवाळीनंतर बांधकाम साहित्याचे दर नेहमी वाढतात. बहुतांश लोक दिवाळीनंतर घराच्या बांधकामाला सुरुवात करतात. याचे मुख्य कारण बांधकामासाठी लागणारे मुख्यत्वेकरून पाणी मुबलक प्रमाणात उपलब्ध असते. गवंडीसुद्धा काम करण्यासाठी उपलब्ध होतात. यंदा मात्र बांधकाम साहित्याचे वाढ वाढण्याची अनेक कारणे ठरली आहेत. अवकाळी पावसामुळे वीटभट्टीतील विटा फुटल्यात, यामुळे भाजलेल्या (पक्का) विटांची कमतरता भासू लागली आहे. विटांच्या गुणवत्तेवर देखील प्रतिकूल परिणाम झाला आहे. सिमेंट, लोखंड दर देखील वाढत आहे. वाळूमिळते तीही अव्वाच्या सव्वा भाव देवून खरेदी करावी लागत आहे.