धर्माबाद, (जि. नांदेड)ः धर्माबाद तालुक्यातील संगम नदीपात्रातून व गोदावरी नदीपात्रातून बेसुमार चोरटी वाळू वाहतूक केली जात आहे. या संदर्भात ‘सकाळ’ने मालिकाच प्रकाशित केल्याने उपविभागीय अधिकारी राजेंद्र शेळके यांच्या मार्गदर्शनाखाली तहसीलदार दत्तात्रय शिंदे यांनी संगम नदीपात्रातून चोरटी वाळू वाहतूक होत असलेल्या चोर रस्त्यावर जेसीबीने ठिकठिकाणी खड्डे खोदून रस्ता बंद केला. यामुळे काही दिवस चोरटी वाळू वाहतूक बंद होती. परंतु, चोरी केल्याशिवाय राहू शकत नसल्याने पुन्हा नवीन युक्ती लढवत संगम नदीपात्राजवळ पुन्हा नवीन रस्ता तयार करण्यात आला आहे. आता संगम नदीपात्रातून रात्रीच्या वेळी पुन्हा चोरटी वाळू वाहतूक टिप्पर, ट्रॅक्टरद्वारे जोमाने सुरू झाली असून एक प्रकारे वाळू माफियांनी उपविभागीय अधिकारी राजेंद्र शेळके यांना आव्हानच दिले आहे.

हेही वाचा -  सरकार घरात बंदिस्त असलेल्यांच्या पोटाची सोय काय...? -

येथून जवळच असलेल्या धर्माबाद तालुक्यातील संगम नदीपात्रातील टिप्पर व ट्रॅक्टरद्वारे बेसुमार चोरटी वाळू वाहतूक धर्माबादेत सुरू होती. या बाबत ‘सकाळ’मधून मालिका प्रसिद्ध होताच नदीपात्राजवळील सर्व चोर रस्ते बंद करण्यात आले आहे. संगम येथील नदीपात्र व गोदावरी नदीपात्रातील वाळूचा लिलाव झालेला नाही. असे असतांना नदी पात्रातील वाळूकडे लक्ष ठेवण्याची जबाबदारी ग्रामपंचायतीसह पोलिस पाटील यांची होती. तसेच संबंधित तलाठी यांचीही आहे. परंतु, गेल्या दोन - तीन महिन्यांपासून रात्रीच्या वेळी टिप्पर, ट्रॅक्टरद्वारे सर्रास बेसुमार चोरटी वाळू वाहतूक केली जात होती. 

कोट्यवधी रुपयांच्या महसूल बुडविल्या जातोय
सद्यःस्थितीत हजारो ब्रास वाळू चोरली गेली असावी. अवैध वाळू वाहतुकी बाबत ‘सकाळ’ने मालिका प्रकाशीत केली होती. याची दखल घेत उपविभागीय अधिकारी राजेंद्र शेळके यांच्या मार्गदर्शनाखाली तहसीलदार दत्तात्रय शिंदे, तलाठी आंबेराय यांनी नदीपात्राला भेट दिली. नदीकडे येणाऱ्या सर्व रस्त्यांची पाहणी करून सर्व चोर रस्ते जेसीबीच्या सहाय्याने नदीपात्राजवळ ठिकठिकाणी खड्डे खोदून बंद करण्यात आले. तसेच संगम येथील एका वाळू साठ्यावर कारवाई करून वाळू जप्त करण्यात आली होती. आता वाळू माफियांनी पुन्हा नवीन युक्ती लढवत संगम नदीपात्राजवळ पुन्हा नवीन रस्ता तयार करण्यात आला आहे. आता संगम नदीपात्रातून रात्रीच्या वेळी पुन्हा चोरटी वाळू वाहतूक टिप्पर, ट्रॅक्टरद्वारे प्रशासनाला न जुमानता सर्रासपणे जोमाने सुरू झाली असून एक प्रकारे वाळू माफियांनी उपविभागीय अधिकारी राजेंद्र शेळके यांना आव्हानच दिले आहे. सदरील भागात कुठल्याही प्रकारचा वाळू लिलाव झालेला नसतानाही अवैधरीत्या बेसुमार वाळू उपसा करून शासनाच्या कोट्यवधी रुपयांच्या महसूल बुडविल्या जात आहे.

महसूलची यंत्रणा कार्यान्वित नाही
तालुक्यातील संगम व गोदावरी नदीपात्रात वाळू माफियांनी पुन्हा बेसुमार वाळू उपसा करून सर्रास चोरटी अवैध वाळू वाहतूक सुरू केली आहे. रात्रीच्या वेळी वाळू चोरीला आळा घालण्यासाठी महसूल विभागाने तलाठी, मंडळ अधिकारी यांचे पथक नियुक्ती केले आहे. परंतु, महसूल यंत्रणा कार्यान्वित नसल्यासारखेच चित्र आहे. यामुळे वाळू माफियांचा नदीपात्रात व रस्त्यावर रात्रीला पुन्हा उजेड सुरू झाला आहे.