मारतळा (जिल्हा नांदेड) : गावात कुठलीही सार्वजनिक पाणी पुरवठा योजना नसल्याने, उन्हाळ्यात पाणी टंचाई ही ठरलेली असे. हंडाभर पाण्यासाठी महिलांची पायपीट पाहुन महिला सरपंचाने पुढाकार घेतला. शासनाकडून कोरोना काळात पाणी टंचाई उपाययोजनेसाठी निधी केव्हा मिळेल याची वाट न पहाता स्व: खर्चाने पाणी टंचाई दुर करत पाणी प्रश्न सोडवून ग्रामस्थांना दिलासा दिला. ऐन टंचाईत मोफत पाणी पुरवठा करुन सामाजिक दातृत्वातून इतरापुढे एक आदर्श ठेवला आहे. पाण्यासाठी प्रयत्न केल्याबद्दल महिला सरपंचाचे सर्वत्र अभिनंदन होत आहे.

लोहा तालुक्यातील हिंदोळा- करमाळा ही गट ग्रामपंचायत आहे. गावात ७५ चे ८० च्या जवळपास उमरे ( घर ) असून छोटेसे खेडेगाव आहे. मात्र गावात सार्वजनिक पाणी पुरवठा करणारी कुठलीच योजना नसल्यामुळे उन्हाळ्यात पाणी टंचाई ठरलेली असते. हंडाभर पाण्यासाठी महिलांसह अबाल वृध्दांना पायपीट करावी लागत असे. मात्र सधन नागरिक खासगी बोअरवेल मालकांकडून वार्षिक तीन ते पाच हजार कुटूंबातील संख्येनुसार रक्कम देऊन पाणी विकत घेत होते. परंतु जनसामान्य नागरिकांची टंचाईत परवड पाहून दिलेल्या आश्वासनाला जागत पाणी प्रश्नाला प्राधान्य दिले. सरपंच पद्मीणबाई जाधव व त्यांचा मुलगा सोपान पाटील जाधव यांनी पुढाकार घेतला. गावाशेजारी असलेल्या आपल्या शेतात बोअरवेलमधून पाईपलाईन टाकुन गावात घरोघरी मोफत नळजोडणी देऊन स्व: खर्चाने पाणी प्रश्न सोडवत गावक-यांची तहाण भागवली.

हेही वाचा - नांदेडच्या कोविड सेंटरमधील कंत्राटी कर्मचाऱ्यांना वेतनाविना केले कार्यमुक्त

महिलांना हंडाभर पाण्यासाठी टंचाईत भटकंती करावी लागत होती. ती थांबविण्यासाठी कांही तरी केल पाहिजे म्हणून मी पुढाकार घेतला. आणि पाणी पाजण्यासारखे दुसरे मोठे पुण्य नाही म्हणत पदरमोड करुन गावचा पाणी प्रश्न सोडवत आहे. महिला भगिणीसाठी कांही करता आले यांचा मला मनस्वी आनंद आहे.

- पद्मीणबाई जाधव, सरपंच, हिंदोळा- करमाळा

संपादन- प्रल्हाद कांबळे