नांदेड : शहरातील गुलजार बाग येथील ६५ वर्षीय बाधित पुरुषाचा शुक्रवारी (ता.२६ जून) मृत्यू झाला असून, गेल्या चोवीस तासामध्ये कोरोनाचा दुसरा बळी झाल्याने नागरिकांमध्ये चिंता वाढली आहे.  उमर कॉलनीतील ५४ वर्षीय बाधित पुरुषाचा उपचारादरम्यान गुरुवारी (ता.२५) रात्री मृत्यू झाला होता.

नांदेडला गुरुवारी (ता.२५) सायंकाळी पाच वाजता प्राप्त झालेल्या अहवालात पाच रुग्ण कोरोना पॉझिटिव्ह आढळून आले. दुसरीकडे उपचार सुरु असलेल्या रुग्णांपैकी १९ रुग्णांची अहवाल निगेटिव्ह आल्याने त्यांना रुग्णालयातून सुटी देण्यात आली. तसेच उमर कॉलनीतील ५४ वर्षीय बाधित पुरुषाचा उपचारादरम्यान रात्री मृत्यू झाला होता. सदरील व्यक्तिचा अहवाल सात जून रोजी पॉझिटिव्ह आला होता. त्याच्यावर विष्णुपुरी येथील डॉ. शंकरराव चव्हाण वैद्यकिय महाविद्यालय व रुग्णालयात उपचार सुरु होते.

हेही वाचा - कोरोनाच्या पार्श्वभूमीवर समोर आला एक मतप्रवाह, कोणता? ते वाचाच

शुक्रवारी सकाळी गुलजार बाग येथील ६५ वर्षीय बाधित पुरुषाचा मृत्यू झाल्याचे जिल्हा शल्यचिकित्सक डॉ. निळकंठ भोसीकर यांनी सांगितले. या रुग्णाचा अहवाल बुधवारी (ता.२४ जून) पॉझिटिव्ह आला होता. त्यामुळे सदर रुग्णावर डॉ. शंकरराव चव्हाण वैद्यकिय महाविद्यालय व रुग्णालयात उपचार सुरु होते. उपचाराला प्रतिसाद दिला नसल्याने या रुग्णाचा सकाळी मृत्यू झाला आहे. त्यामुळे जिल्ह्यात कोरोनाबाधित मृत्यू पावलेल्यांची संख्या १६ वर गेली आहे.

हे देखील वाचाच - Video - नांदेड जिल्ह्यातील शेतकऱ्यांवर दुबार पेरणीचे संकट

गुरुवारी सायंकाळी पाच वाजता ३६ अहवाल प्राप्त झाले. त्यापैकी ३१ अहवाल निगेटिव्ह आले असून पाच अहवाल पॉझिटिव्ह आहेत. त्यामुळे आता जिल्ह्यातील रुग्णांची एकूण संख्या ३३१ इतकी झाली आहे. गुरुवाच्या अहवालात विसावानगर भागातील १७ वर्षीय युवकाचा समावेश आहे. तसेच चिखलभोसी (ता.कंधार) येथील तीन रुग्णांचा तर देगलूर येथील एका ५९ वर्षीय महिलेचा समावेश आहे.