नांदेड : समाजाच्या मुख्य प्रवाहापासून दूर, सर्वदृष्टीने अत्यंत मागास असलेल्या विद्यार्थ्यांचा सर्वांगीण विकास करून त्यांना मुख्य समाज प्रवाहात सामील करण्यासाठी शासनाने सुरु केलेल्या विविध प्रयत्नात राज्यातील नामांकित इंग्रजी शाळांचे खूप मोठे कल्याणकारी योगदान आहे. या शाळांमधून शिक्षण घेणाऱ्या जवळपास ५७ हजार विद्यार्थ्यांचा शैक्षणिकस्तर उंचावल्याचे दिसून येत आहे. 

आदिवासी समाजातील आर्थिक, शैक्षणिक मागासलेपण दूर व्हावे, त्यांच्या बालकांना समाजातील इतर वर्गाच्या विद्यार्थ्यांबरोबर राहून शिक्षण घेण्याची आणि विकासाची समान संधी उपलब्ध व्हावी, यासाठी शासनाने मराठी माध्यमांच्या निवासी शाळा सोबतच शैक्षणिक वर्ष २०१०-११ पासून इंग्रजी माध्यमांचे उत्कृष्ट शिक्षण देणाऱ्या नामांकित इंग्रजी शाळा उपलब्ध करून दिल्या आहेत. शैक्षणिक गुणवत्तेच्या आधारे शासनाने या शाळांची निवड केली असून आजघडीला राज्यातील नामांकित इंग्रजी माध्यमांच्या शाळेत जवळपास ५७ हजार विद्यार्थी शिक्षण घेत आहेत. 

हेही वाचा - नांदेड जिल्ह्यात १३ लाख मतदार निवडणार गावचे कारभारी; १०६ ग्रामपंचायती बिनविरोध तर ९०७ ग्रामपंचायतीसाठी शुक्रवारी मतदान

शासनाकडुन देण्यात येणा-या व इतर योजनेच्या तुलनेत अत्यंत नाममात्र शुल्कातून विद्यार्थ्यांना अत्यंत दर्जेदार निवासी व्यवस्था, सकस आहार, शालेय गणवेश, स्वच्छता प्रसाधने, वैयक्तिक साहित्य, पाठ्यपुस्तके सर्व प्रकारचे शैक्षणिक साहित्य, वैद्यकीय सुविधा, शैक्षणिक सहली, विद्यार्थ्यांना प्रकल्प कार्यालयापासून ते शाळेपर्यंत ने-आण करण्याची सुविधा इत्यादी अनेक बाबी उपलब्ध करून दिल्या जातात. 

राज्यातील आदिवासी विद्यार्थ्यांच्या शिक्षणासाठी आदिवासी विभागाकडून इंग्रजी शिक्षणाबरोबरच शासकीय आश्रम शाळा, सैनिकी शाळा, अनुदानित आश्रम शाळा चालविल्या जात आहेत. अशा शाळांसाठी दीड ते दोन लाख रुपये अनुदान दिले जाते. शासनाने नव्यानेच आदिवासी विद्यार्थ्यांसाठी एकलव्य पब्लिक स्कूल सुरू केली असून या शाळांनाही दरवर्षी प्रति विद्यार्थी एक लाख तीस हजार रुपये अनुदान देण्यात येते. 

योजनेचा लाभ घ्यावा 
आदिवासी समाजातील विद्यार्थ्यांनी या शासनाच्या यशस्वी योजनेमध्ये सहभागी होऊन, आदिवासी विद्यार्थ्यांचे जीवनमान उंचावण्यासाठी व इतर प्रगत समाजातील विद्यार्थ्यांसोबत शिक्षण घेण्यासाठी या योजनेचा लाभ घ्यावा. 
- भास्करराव पाटील खतगावकर, अध्यक्ष (नामांकित इंग्लिश स्कूल ट्रस्टीज् असोसिएशन) 

गुणवत्तापूर्ण शिक्षण दिले जाते 
आदिवासी विद्यार्थ्यांच्या सर्वांगीण विकासासाठी शासनाने सुरू केलेल्या शैक्षणिक संस्थांमध्ये तुल नात्मक दृष्ट्या नामांकित इंग्रजी माध्यमांच्या शाळातून अत्यंत कमी खर्चात उच्च दर्जाचे गुणवत्तापूर्ण शिक्षण दिले जात असल्याने शासनाच्या योजनेचे फलित दिसून आले आहे. 
- शिवाजीराव पाटील कव्हेकर, सचिव (नामांकित इंग्लिश स्कूल ट्रस्टीज् असोसिएशन)

नांदेड जिल्ह्यातील इतरही बातम्या वाचण्यासाठी येथे क्लिक करा