नांदेड ः जिल्ह्यात कोविड रुग्णांची संख्या झपाट्याने वाढत असल्याने पीपीई कीटचाही वापर वाढला आहे. मात्र, या कीटचा आरोग्य कर्मचाऱ्यांना त्रास होत आहे. अशातच तापमानाचा पारा वाढल्याने पीपीई कीट परिधान करणाऱ्या आरोग्य कर्मचाऱ्यांना सहा ते सात तास प्यायला पाणीही मिळत नाही. अशा परिस्थितीत या कर्मचाऱ्यांना कोरोनाने नव्हे, तर पीपीई कीटच जीवघेणी ठरत आहे. 

गेल्या काही दिवसांपासून जिल्ह्यात कोविड रुग्णांच्या संख्येत लक्षणीय वाढ होत आहे. रुग्णालयात दाखल कोविड रुग्णांची संख्या वाढल्याने पीपीई कीटचाही वापर वाढला आहे. कोविड वार्डात रुग्णसेवा देणाऱ्या प्रत्येक आरोग्य कर्मचाऱ्यांसह डॉक्टरांनाही सहा ते सात तास पीपीई कीट परिधान करावी लागत आहे. त्यामुळे एकदा पीपीई कीट परिधान केल्यावर या कर्मचाऱ्यांना पाणी देखील पिणे शक्य होत नाही. 

हेही वाचा - काढाल अंगावर तर बेतेल जीवावर; परभणीमध्ये पॉझिटिव्ह रुग्णांची संख्या वाढली

दुसरीकडे जिल्ह्यातील तापमानात लक्षणीय वाढ झाल्याने उकाडा वाढला आहे. पीपीई कीटचे कापड प्लास्टिकच्या आवरणाने आच्छादलेले असल्याने त्यातून वाराही जात नाही आणि पाणीही पिता येत नाही. त्यामुळे पीपीई कीट परिधान करणाऱ्या कर्मचाऱ्यांना मोठ्या प्रमाणात घाम येणे, घशाला कोरड पडणे, हातापायाला व्रण येणे, चक्कर येणे, युरिन इन्फेक्शन, फंगल इन्फेक्शन, थकवा आदी समस्यांना सामोरे जावे लागत आहे. जिल्ह्यात उन्हाचा पारा हा ४१ अंश सेल्सिअसवर गेल्याने पीपीई कीट परिधान करणाऱ्या वैद्यकीय कर्मचाऱ्यांच्या समस्येत वाढ होतांना दिसत आहे. 
  
कर्मचाऱ्यांना दिलासा द्यावा 
सद्यस्थितीत स्वतःच्या सुरक्षेसाठी पीपीई कीट अनिवार्य आहे. मात्र या किटमुळे आरोग्य कर्मचाऱ्यांना मोठ्या प्रमाणात त्रास सहन करावा लागतो. कारण या किटमधून हवा अजिबात शरीरापर्यंत पोहचत नाही. त्यामुळे सलग एका कर्मचाऱ्याकडे हे काम न देता टप्प्याटप्प्याने देण्याची मागणी होत आहे. शासनाने आरोग्य कर्मचाऱ्यांच्या समस्येकडे लक्ष देऊन समस्या सोडविण्यासाठी पावले उचलावीत. जेणेकरून कर्मचाऱ्यांना दिलासा मिळेल. 

हे देखील वाचाच - नांदेड जिल्हा बँकेवर महाविकास आघाडीचे वर्चस्व, भाजपला दणका

खासगी रुग्णालयांना पीपीई कीटचा विसर
शासकीय रुग्णालयातील कर्मचारी नियमित पीपीई कीटचा वापर करत असून, त्या तुलनेत खासगी रुग्णालयांमध्ये पीपीई कीटचा वापर होत नसल्याने तेथील आरोग्य कर्मचाऱ्यांना जीव धोक्यात ठेवून कोरोना बाधीत रुग्णांवर उपचार करावे लागत आहे. ‘‘आमच्या दवाखान्यामध्ये ५०वर कर्मचारी आहे. प्रत्येकाला पीपीई कीट देणे आम्हाला परवडत नाही. कारण, पीपीई किटचा एकाचवेळी वापर करावा लागत असल्याने त्यावरील दररोजचा खर्च परवडत नाही’’, अशी प्रतिक्रिया एका रुग्णालयातील डॉक्टरने दिली. 

नांदेड जिल्ह्यातील इतरही बातम्या वाचण्यासाठी येथे क्लिक करा