नांदेड : शहरालगत गोदावरी नदीच्या (Govdavari River) काठावर ईदगाह मैदान परिसरात बुधवारी (ता. चार) दुपारी अंदाजे ६० किलो वजनाचे आणि ५० वर्षांचे कासव (Turtle) आढळून आले. नागरिकांनी माहिती दिल्यानंतर वन विभागाच्या अधिकारी, कर्मचाऱ्यांनी घटनास्थळी भेट देऊन कासव ताब्यात घेतले आहे. गेल्या काही दिवसापासून झालेल्या पावसामुळे गोदावरी नदी दुथडी भरुन वाहत आहे. त्यात डॉ. शंकरराव चव्हाण विष्णुपुरी प्रकल्पाचे(Vishnurpuri Dam) दरवाजे उघडून नदीपात्रात पाणी (Nanded) सोडण्यात आले होते. त्यामुळे काही वन्यजीव पाण्याबाहेर येत आहेत. गोदावरी नदीकाठालगत देगलूर नाका भागात असलेल्या इदगाह मैदान परिसरात बुधवारी दुपारी अंदाजे ६० किलो वजनाचा कासव आढळून आला.

पुढे हा कासव पाण्याच्या वर आल्यामुळे येथील नागरिकांनी वनविभागाला याबाबत माहिती दिली. वनपरिक्षेत्र अधिकारी श्री. कावळे यांच्या मार्गदर्शनाखाली वनपाल आर. पी. झाडे व कर्मचाऱ्यांनी घटनास्थळी भेट दिली आणि दुर्मिळ कासवास ताब्यात घेतले.सदर कासव पाहण्यासाठी परिसरातील नागरिकांनी गर्दी केली होती. मात्र, तरुणांनी वनविभागाला याबाबत वेळीच माहिती दिल्याने दुर्मिळ कासवास जीवदान मिळाले. सदरील कासव हे नदीतून वाहत आले असून अंदाजे पन्नास वर्षाचे व साठ किलो वजनाचे आहे. त्यास वनविभागाने ताब्यात घेतले असल्याची माहिती वनपरिक्षेत्र अधिकारी श्री. कावळे व वनपाल आर. पी. झाडे यांनी दिली.