नांदेड ः  जिल्ह्यात जिल्हाधिकारी यांनी कडक लॉकडाउन लावला आहे. याची खरी झळ गोरगरीब, मजुरदार, हमाल, छोटे-मोठे व्यावसायीक यांना बसत आहे. आपले व आपल्या परिवाराचे पोट भरायचे कसे? हा यक्ष प्रश्न त्यांना भेडसावत आहे. 

तरोडा नाका ते वर्कशॉप रोडवर प्रतिभा व बबन चव्हाण हे घिसडी दांम्पत्य आपला पारंपारिक व्यवसाय करून आपले व कुटुंबाचे पालनपोषण करत आहेत. लॉकडाउनच्या पूर्वीची परिस्थिती चांगली होती. दररोजी ३०० ते ४०० रुपये मिळकत होत होती. त्यात कुटुंब व्यवस्थीतरित्या चालत होते. पण कोरोनाच्या महामारीमुळे संपूर्ण आयुष्याची ‘दिशा’ बदलून ‘दशा’ झाली आहे. 

हेही वाचा - ऐकावं ते नवलच: शेळीने दिला दुतोंडी पिल्याला जन्म

तरोडा नाका ते वर्कशॉप रोडवर हे दांपत्य पाल मांडून आपला व्यवसाय करत आहेत. शेतीची औजारे, कुऱ्हाड, कोयते, विळे, खुरपे, नांगर इत्यादी साहित्य शेवटण्याचे काम करतात. त्याचबरोबर बकऱ्याचे पाय भाजून देणे ही कामेही त्यांना मिळत होती. परंतु, लॉकडाउनमुळे ग्राहक फिरकत नाहीत. त्यामुळे ३० ते ५० रुपयांवर दिवस काढावा लागत असल्याची खंत चव्हाण दाम्पत्यांनी ‘सकाळ’शी बोलताना व्यक्त केली आहे. 

हे देखील वाचाच - लॉकडाऊनचा जिंतूरात बळी

बबन चव्हाण म्हणाले की, ‘हाताला काम नाही व पोटाला अन्न नाही’ असे असलेतरी जगण्यासाठी असे दिवस काढल्याशिवाय दुसरा काहीच पर्याय उरलेला नाही. कधी कधी तर भवनीसुद्धा होत नाही. यामुळे प्रपंच कसा चालवायचा? हा प्रश्न पडल्याचे श्री. चव्हाण यांनी सांगितले. गिऱ्हाईक येत नसल्याने उपासमारी होत आहे. शासनाने अशा परिस्थितीत आमच्या सारख्यांना मदत करावी, अशी मागणी या दाम्पत्याने व्यक्त केली आहे.