नांदेड - शहर आणि जिल्ह्यात वाढत जाणाऱ्या कोरोनाच्या प्रादुर्भावाला रोखण्यासाठी जिल्हा प्रशासनातर्फे बुधवारी (ता. २४) मध्यरात्रीपासून संचारबंदी लागू करण्यात आली असून ती ता. चार एप्रिलपर्यंत लागू राहणार आहे. संचारबंदीचे नियम पाळून प्रादुर्भावाला आटोक्यात आणण्यासाठी संचारबंदीच्या नियमाचे कठोरपणे पालन करण्याचे आवाहन जिल्हादंडाधिकारी डॉ. विपीन इटनकर यांनी केले आहे.  

नांदेड शहर आणि जिल्ह्यात गेल्या एक महिन्यापासून कोरोनाचा प्रादुर्भाव दिवसेंदिवस वाढत आहे. जिल्हा प्रशासनासह महापालिका आणि जिल्ह्यात सर्व पातळीवर प्रयत्नांची शर्त केली जात असून जनतेनेही तेवढ्याच जबाबदारीने जाहीर केलेल्या संचारबंदीच्या नियमांचे काटेकोर पालन करावे, असे आवाहन जिल्हादंडाधिकारी डॉ. विपीन इटनकर यांनी केले आहे. हा लढा सर्वांच्या मुक्तीचा असून सर्वांनी एकत्रीत आपले कर्तव्य व काळजी घेतली तर जिल्ह्यात वाढत जाणाऱ्या कोरोना प्रादुर्भावाला आपण यशस्वीपणे नियंत्रणात आणू असा विश्वासही त्यांनी व्यक्त केला. 

हेही वाचा - आजपासून सात दिवस परभणी जिल्ह्यात संचारबंदी लागू; अत्यावश्यक सेवांना वगळले

शस्त्रबंदी व जमावबंदी आदेश लागू 
दरम्यान, नांदेड जिल्ह्यात ता. २५ मार्च रोजी सकाळी सहा वाजल्यापासून ते ता. आठ एप्रिलच्या मध्यरात्री पर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. 

प्रशासनातर्फे प्रतिबंधात्मक उपाययोजना 
संचारबंदी नियम पाळून प्रादुर्भावाला आटोक्यात आणण्यासाठी प्रशासनातर्फे प्रतिबंधात्मक उपाययोजना करण्यात येत आहेत. शासकीय रुग्णालयातील संपर्क अधिकारी म्हणून जिल्हा रुग्णालय कोविड हॉस्पिटल नांदेड येथील डॉ. कुलदिपक अंकुशे (९८५०९७८०३६), शासकीय आयुर्वेदिक महाविद्यालय नांदेड येथील डॉ. खान निसार अली (९३२५६०७०९९), शासकीय वैद्यकीय महाविद्यालय विष्णुपुरी डॉ. वाय. एच. चव्हाण (९९७००५४४३४) यांची नियुक्ती करण्यात आली आहे. 

हेही वाचलेच पाहिजे - लाॅकडाउन काळात नांदेड जिल्ह्यातील बस सेवा बंद; परजिल्ह्यात व आंतरराज्य मार्गावर मात्र धावणार बसेस
 

हे राहणार बंद  

• हॉटेल्स, उपहारगृह, बार तसेच सार्वजनिक कार्यक्रम. 
• जिल्हातंर्गत बससेवा बंद, लांब पल्ल्याच्या सुरू 
• मटन, चिकन, अंडी व मासे विक्री 
• सार्वजनिक व खासगी प्रवासी वाहने 
• सर्व प्रकारचे बांधकाम व कंन्स्ट्रक्शनची कामे 
• चित्रपटगृहे, व्यायामशाळा, जलतरण तलाव, रिसॉर्ट, मॉल, आठवडी बाजार 
• सामाजिक, राजकीय, सांस्कृतीक व धार्मिक कार्यक्रम 
• सलुन व ब्युटी पार्लरची दुकाने 
• मोकळ्या जागेत, उद्यानांमध्ये फिरणे. 
• सार्वजनिक ठिकाणी मॉर्निंग तसेच इव्हिनिंग वॉक 
• शाळा, महाविद्यालये तसेच शिकवणी वर्ग बंद 

हेही वाचलेच पाहिजे - कोरोना बाधीत युवकाचा पथकाला गुंगारा, ठोकली धूम; कळमनुरी येथील धक्कादायक प्रकार, पोलिसांनी वेळीच घेतले ताब्यात
 

यांना आहे सवलत 

• किराणा दुकाने दुपारी १२ वाजेपर्यंत सुरु राहतील. 
• दुध विक्री व वितरण सकाळी १० वाजेपर्यंत करता येईल. 
• भाजीपाला व फळांची ठोक विक्री सकाळी सात ते १० या वेळेतच करता येईल. 
• खासगी व सार्वजनिक वैद्यकिय सेवा सुरु राहतील. 
• पेट्रोल पंप व गॅस वितरण सेवा सुरु राहणार. 
• वृत्तपत्र विक्रेत्यांना सकाळी सहा ते नऊ या वेळेतच वर्तमानपत्रांचे वितरण करता येईल. 
• पाणी पुरवठा (जार, टॅंकर) दुपारी १२ वाजेपर्यंत सुरु ठेवता येतील. 
• स्वस्त धान्य दुकाने सुरु राहतील. 
• अंत्यविधीसाठी २० व्यक्तींच्या उपस्थितीस परवानगी. 
• औषध विक्रीचे दुकाने २४ तास सुरु राहतील.