तामसा ( जिल्हा नांदेड ) : पाथरड नदीवरील नळकांडी पूलाचा मोठा भाग पावसाळ्याच्या सुरुवातीलाच नदीला आलेल्या पुराच्या तडाख्यात वाहून गेला असून पावसाळ्यात पुलाची पडझड होण्याची परंपरा याही वर्षी कायम आहे. दरवर्षी पुराने पुलाचे नुकसान होणे व पुन्हा तात्पुरती डागडुजी करुन पूल वापरतात येणे, हा प्रकार चालूच आहे.

आठवड्यापूर्वी तामसा परिसरात झालेल्या जोरदार पावसामुळे नदीला पूर येऊन पाथरड नदीच्या पूलाचा दरवर्षी वाहून जाणारा भाग यावेळीही वाहून गेला. त्यामुळे आता हा पूल धोकादायक अवस्थेत असून पुलाचा उर्वरित भाग पुराच्या तडाख्याने कधी वाहून जाईल याचा नेम नाही. हा पूल कालबाह्य झाला असून त्याची नव्याने निर्मिती होणे अत्यंत गरजेचे आहे. धोकादायक अवस्थेतील या पूलांमध्ये बोरवेलचे मोठे वाहन पडून दोन परप्रांतीय मजूर दगावले होते. पूलाच्या दुरवस्थेमुळे वाहने, बैलगाडी, जनावरे, नागरिक पडणे अशा दुर्देवी घटना मोठ्या प्रमाणात येथे घडल्या आहेत.

हेही वाचा - वाचा काय आहे नेमकं कारण?

पाथरड गावाचा नवीन वस्ती, जिल्हा परिषद शाळा, आरोग्य उपकेंद्र, पशु उपकेंद्र, तामसा यांच्याशी संपर्क जोडणारा हा एकमेव पूल आहे. कमी उंचीच्या या पुलावरुन पुराचे पाणी वाहतांना दिवसभर गावाचा संपर्क तुटला जातो. यामुळे स्थानिकांना मोठा त्रास दर पावसाळ्यात दुर्देवाने सहन करावा लागतो. या पूलाची उंची वाढवून नवीन निर्मिती करण्याची स्थानिकांची मागणी अनेक वर्षापासून आहे.

पण या मागणीला अद्यापही यश मिळाले नसून दरवर्षी पडझड झालेल्या पूलाच्या भागांची डागडुजी केली जाते. दरवर्षी डागडुजीवर खर्च ना पूलाच्या कामाचा, ना ग्रामस्थांच्या उपयोगाचा ठरत आहे. त्यामुळे पाथरड नदीवर नवा व उंच पूल उभारणे हे आत्ता ग्रामस्थांना दरवर्षीच्या त्रासातून मुक्ती मिळण्यासाठी आवश्यक आहे.

संपादन- प्रल्हाद कांबळे