नांदेड : संपूर्ण महाराष्ट्रात संयुक्तपणे क्षयरोग व कुष्ठरोग शोध मोहीमेला एक डिसेंबर रोजी सुरुवात झाली आहे. नांदेड जिल्ह्यात २५ लाख ७८ हजार ३९९ लोकसंख्येपैकी एक लाख २५ हजार २३६ लोकसंख्येची पाहणी करण्यात आली आहे. सोमवारपर्यंत (ता.सात) दोन हजार ८८२ संशयितांपैकी एक हजार ७२ नागरिकांची तपासणी झाली. त्यात दहा कुष्ठ रुग्णांचे निदान होवून उपचार सुरु झालयाची माहिती कुष्ठरोग विभागाचे प्रभारी सहाय्यक संचालक डॉ. अमृत चव्हाण व प्रभारी जिल्हा क्षयरोग अधिकारी डॉ. संतोष सुर्यवंशी यांनी दिली.
नांदेड जिल्ह्यात जिल्हाधिकारी डॉ. विपिन ईटणकर, जिल्हा परिषदेच्या मुख्य कार्यकारी अधिकारी वर्षा ठाकूर-घुगे, प्रभारी जिल्हा शल्य चिकित्सक डॉ. नीळकंठ भोसीकर, जिल्हा आरोग्य अधिकारी डॉ. बालाजी शिंदे यांच्या मार्गदर्शनाखाली संयुक्त क्षयरोग व कुष्ठरोग मोहिम राबविली जात आहे. नांदेड जिल्ह्यातील ग्रामीण लोकसंख्येच्या ४७ टक्के भागात आरोग्य कर्मचाऱ्यांनी प्रत्यक्ष घरी जाऊन पाहणी केली असता ९६१ संशयित रुग्णांची बेडका नमुने तपासण्यात आले.
त्यापैकी २२ क्षय रुग्णांचे निदान झाले असून, उर्वरित कालावधीत नागरिकांनी दोन आठवडे पेक्षा जास्त दिवसांचा खोकला, रात्रीचा येणारा हलकासा ताप, वजन घटणे, भूक मंदावणे, थुंकीतून रक्त पडणे अशी लक्षणे असणाऱ्यांनी आपले बेडका नमुने तपासणी करून घेऊन आरोग्य प्रशासनास सहकार्य करण्याचे आवाहन प्रभारी जिल्हा क्षयरोग अधिकारी डॉ. संतोष सुर्यवंशी यांनी केले आहे.
या रुग्णांनी करून घ्यावी तपासणी
यासोबतच कुष्ठरोगाबाबत ज्या व्यक्तींच्या त्वचेवर फिकट लालसर बधिर चट्टा, त्या ठिकाणी घाम न येणे, जाड बधिर तेलकट चकाकणारी त्वचा, त्वचेवर गाठी असणे ,कानाच्या पाळ्या जाड होणे, भुवयांचे केस विरळ होणे, डोळे पूर्ण बंद करता न येणे, तळहातावर व तळपायावर मुंग्या येणे, बधिरपणा अथवा जखमा असणे, हाताची व पायाची बोटे वाकडी असणे, हात मनगटापासून किंवा पाय घोट्यापासून लुळा पडणे, त्वचेवर थंड व गरम संवेदना न जाणवणे हात व पायामध्ये अशक्तपणा जाणवणे, हातातून वस्तू गळून पडणे ,चालताना पायातून चप्पल गळून पडणे ,आदी लक्षणे असणाऱ्या व्यक्तींनी आरोग्य कर्मचाऱ्यांमार्फत आपली तपासणी करून घ्यावी.
नागरिकांनी सहकार्य करावे
जिल्ह्यात एक डिसेंबर पासून संयुक्त क्षरोग व कुष्ठरोग मोहिमेला सुरुवात झाली. ३१ डिसेंबरपर्यंत ही मोहिम सुरु राहणार असून दोन हजार ६९६ पथकामार्फत प्रत्यक्ष घरी जावून पाहणी केली जाणार आहे. यासाठी नागरिकांनी सहकार्य करावे.
- डॉ. अमृत चव्हाण, प्रभारी सहाय्यक संचालक कुष्ठरोग विभाग
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.