नांदेड - वाळूचा टिप्पर नियमित चालू ठेवण्यासाठी २१ हजारांची लाच घेताना एका पोलिस शिपायासह त्याच्यासोबतच्या एकाला अटक करण्यात आली. लाचलुचपत प्रतिबंधक विभागाने सोमवारी (ता. सहा) रात्री ही कारवाई केली.

वाळूचे तीन टिप्पर नियमितपणे चालवू देण्यासाठी, यापुढे कारवाई न करण्यासाठी प्रतिटिप्पर सात हजार रुपयेप्रमाणे २१ हजारांची मागणी पोलिस शिपायाने तक्रारदाराकडे केली होती. त्यातील सात हजार ''फोन पे’द्वारे स्वीकारले. उर्वरित १४ रक्कम खासगी व्यक्ती मारुती कवळे यांच्यामार्फत स्वीकारली. याबाबत नांदेड ग्रामीण पोलिस ठाण्याचे शिपाई शिवाजी गंगाधर पाटील (वय ३५, नांदेड), मारुती गोविंदराव कवळे (३४, इळेगाव ता. उमरी) यांच्याविरुद्ध नांदेड ग्रामीण पोलिस ठाण्यात गुन्हा दाखल झाला.

लाचलुचपत प्रतिबंधक विभागाचे पोलिस अधीक्षक डॉ. राजकुमार शिंदे, अतिरिक्त पोलिस अधीक्षक धरमसिंग चव्हाण, अपअधीक्षक राजेंद्र पाटील यांच्या मार्गदर्शनाखाली उपअधीक्षक अशोक इप्पर, निरीक्षक नानासाहेब कदम, जमीर नाईक, एकनाथ गंगातीर्थ, सचिन गायकवाड, मारोती मुलगीर, गजानन राऊत आदींनी ही कारवाई केली. उपअधीक्षक इप्पर तपास करीत आहेत.

झडतीत सापडले सव्वादोन लाख

या कारवाईनंतर लाचलुचपत प्रतिबंधक विभागाने लाचेचे १४ हजार जप्त केले. पथकाने झडती घेतली असता पोलिस शिपायाकडे सव्वादोन लाख रुपये सापडले. तेही पथकने जप्त केले.