नांदेड : सततची नापिकी व कर्जबाजारीपणामुळे कंटाळून नांदेड जिल्ह्यातील दोन शेतकऱ्यांनी गळफास घेऊन आत्महत्या केल्याच्या घटना उघडकीस आल्या. याप्रकरणी उस्माननगर व कुंटुर पोलिस ठाण्यात आकस्मिक मृत्यूच्या नोंदी करण्यात आल्या आहेत. ऐन पेरणीत शेतकऱ्यांच्या आत्महत्येमुळे पुन्हा एकदा खळबळ उडाली आहे.

याबाबत अधिक माहिती अशी की लोहा तालुक्यातील सुगाव येथील राजकुमार शंकर शिरसे (वय 38) यांच्या शेतात मागील काही वर्षापासून सतत नापिकी होत होती. त्यामुळे त्यांनी बँकेचे कर्ज काढले, परंतु शेतातील उत्पन्न घटल्याने कर्जाचा बोजा वाढत गेला. अखेर त्यांनी ता. 26 जून रोजी सकाळी साडेदहाच्या सुमारास आपल्या शेतात जाऊन झाडाला गळफास घेऊन आत्महत्या केली. याप्रकरणी अनुसयाबाई शंकर शिरसे यांच्या माहितीवरून उस्माननगर पोलिस ठाण्यात आकस्मिक मृत्यूची नोंद करण्यात आली असून तपास श्री कानगुले करत आहेत.

हेही वाचा - कोवीड लसीकरणात महावितरणची आघाडी; ८० टक्के कर्मचाऱ्यांचे लसीकरण पूर्ण

तर दुसर्‍या घटनेत नायगाव तालुक्यातील अंतरगाव येथील शेतकरी मारुती विठ्ठल उर्फ माधवराव शिंदे ( वय ३५ ) यांनीही सततच्या नापिकीला व कर्जबाजारीपणाला कंटाळून ता. 28 जून रोजी सायंकाळी साडेसहाच्या सुमारास अंतरगाव शिवारातील प्रभू यशवंत शिंदे यांच्या शेतातील लिंबाच्या झाडाला गळफास घेऊन आत्महत्या केली. ज्ञानेश्वर गंगाधर शिंदे यांच्या माहितीवरुन कुंटुर पोलिस ठाण्यात आकस्मिक मृत्यूची नोंद करण्यात आली आहे. तपास हवालदार श्री कानगुले करत आहेत.

येथे क्लिक करा - मोठी बातमी ! शिक्षकांसह महापालिकेशी संलग्नित विभागांमधील काही कर्मचाऱ्यांनी एक डोस घेतला, परंतु दुसरा डोस घेतलाच नाही, अशांची संख्या लक्षणीय आहे.

एकाचा पाण्यात बुडून मृत्यू

बालाजी हुलन्ना पानगटवाड (वय 26) राहणार गोजेगाव, तालुका मुखेड हा शेतात तननाशक फवारणी करण्यासाठी गेला होता. फवारणीसाठी पाणी आणण्याकरिता तो विहिरीवर गेला असता त्याचा पाय घसरुन तो विहिरीत पडला. पोहता येत नसल्याने त्याचा पाण्यात बुडून मृत्यू झाला. याप्रकरणी मुक्रमाबाद पोलिस ठाण्यात आकस्मिक मृत्यूची नोंद करण्यात आली आहे. तपास हवालदार श्री वाडेकर करत आहेत.