नांदेड : जिल्ह्यात कोरोना रुग्णांची संख्या वाढत आहे. जिल्ह्यातील सर्वात मोठे शासकीय रुग्णालय म्हणून ओळख असलेल्या विष्णुपुरीच्या डॉ. शंकरराव चव्हाण शासकीय रुग्णालयात दाखल होणाऱ्या रुग्णांची संख्या नाही. तेव्हा आलेल्या प्रत्येक रुग्णाची आरोग्य तपासणी होणे गरजेचे आहे. म्हणून रविवारी (ता.१७) पासून अधिष्ठाता डॉ. चंद्रकांत म्हस्के व वैद्यकीय अधीक्षक डॉ. वाय. एच. चव्हाण यांच्या उपस्थितीत कोरोना कोविड केअर सेंटर सुरू करण्यात आले आहे.

रुग्णालयातील पॅथालॉजी लॅब अद्ययावत 
कोरोनाचा वाढता प्रादुर्भाव रोखण्यासाठी रुग्णालयात आलेल्या प्रत्येक रुग्णाची आरोग्य चाचणी करणे गरजेचे असल्याच्या सूचना आरोग्य विभागाच्या वतीने देण्यात आल्या आहेत. त्यामुळे आरोग्य विभागामार्फत डॉक्टर, आशा वर्कर, आरोग्य सेविका यांच्यामार्फत गावापासून ते शहरात राहणाऱ्या नागरिकांची आरोग्य तपासणी करण्यात येत आहे. तपासणी दरम्यान संशयित व्यक्तींचे स्वॅब घेऊन ते लॅबमध्ये पाठविण्यात येत आहेत. विष्णुपुरीच्या शासकीय रुग्णालयातील पॅथालॉजी लॅब अद्ययावत करण्यात आली असून या लॅबमध्ये कोरोनासंबंधी तपासणी करण्यात येणार असल्याची माहिती वैद्यकीय अधीक्षक डॉ. चव्हाण यांनी दिली. या वेळी डॉ. श्री. इनामदार यांचीदेखील उपस्थिती होती. 

आरोग्याच्या दृष्टीने चांगली गोष्ट 
रुग्णालयात रविवारपासून सुरु करण्यात आलेल्या लॅबमध्ये कोरोनाची चाचणी केली जात नाही. परंतु, पॅथॉलॉजी लॅबचे नुतनीकरण व लॅबचे अत्याधुनिकरण करण्यात आले आहे. त्याद्वारे रुग्णांची आरोग्य तपासणी करण्यात येणार आहे, ही रुग्ण व डॉक्टरांच्या आरोग्याच्या दृष्टीने चांगली गोष्ट आहे. ज्यांना ताप किंवा खोकला, घशात खवखव असेल तर त्या संशयित रुग्णाची वेगळी चाचणी करण्यास व रुग्ण डिटेक्ट होण्यास सोईस्कर होणार आहे.
-डॉ. वाय. एच. चव्हाण, वैद्यकीय अधिक्षक.